З нагоды літургічнага ўспаміну благаслаўлёнай Рэгіны Протман у парафіі Найсвяцейшай Тройцы ў Зэльве (Слонімскі дэканат) дзеці і моладзь падрыхтавалі пантаміму.
Тым самым яны пазнаёмілі гледачоў з постаццю Маці Рэгіны, заснавальніцы супольнасці сясцёр св. Кацярыны.
Рэгіна Протман нарадзілася ў 1552 годзе ў Браневе. У 19 гадоў яна адчула пакліканне і, ідучы за Хрыстовым голасам, заснавала Кангрэгацыю сясцёр святой Кацярыны. Праз усё сваё жыццё яна дапамагала хворым, апекавалася беднымі і займалася выхаваннем дзяўчат.
Чэрпаючы з крыніцы сваёй заснавальніцы, сёстры кацярынкі да гэтай пары рэалізуюць яе харызмат. У Гродзенскай дыяцэзіі законніцы гэтай супольнасці служаць у парафіі Божага Цела ў Крамяніцы і парафіі Божай Міласэрнасці ў Гродне (Вішнявец).
Анастасія Мазец
Фота: Наталля Мазец