Адрас: г. Гродна, вул. К. Маркса, 4 (офіс); вул. Дзяржынскага, 91 (сацыяльны і аптэчны пункт)
Час працы: 9.00—17.00 (пн - пт);Субота, нядзеля і касцёльныя святы - выхадныя
Тэлефон: (8 0152) 60-25-31
Факс: (8 0152) 55-46-68
E-mail: caritasgrodno@yandex.ru
Дабрачынная арганізацыя “Карытас” існуе ў Гродзенскай дыяцэзіі з 1990 года. На працягу 4-ох гадоў яна працавала ў межах парафій: размяркоўвала сярод патрабуючых гуманітарныя грузы, якія паступалі ад ахвярадаўцаў з Аўстрыі, Даніі, Германіі, Ірландыі, Польшчы і ЗША. У сакавіку 1994 года “Карытас” атрымаў афіцыйную рэгістрацыю Дыяцэзіяльнай грамадскай дабрачыннай арганізацыі.
У 1994 годзе адкрыты офіс "Карытас", сацыяльны цэнтр па размеркаванні гуманітарнай дапамогі і сацыяльны аптэчны пункт, дзе патрабуючыя маюць магчымасць бясплатна атрымаць перавязачны матэрыял, неабходныя медыкаменты.
З 1996 года "Карытас" разам з сёстрамі назарэтанкамі арганізавалі сталовую для малазабяспечаных грамадзян. У 1997 годзе створана зона адпачынку для дзяцей пад Лідай у в. Нецеч. Пачынаючы з 1992 года "Карытас" арганізоўвае паездкі дзяцей на аздараўленчы адпачынак у Аўстрыю і Польшчу. З 1998 года ў некаторых парафіях дыяцэзіі таварыствам рэалізуецца праект “Канікулы з Богам”, дзякуючы якому дзеці маюць магчымасць адпачываць і развівацца духоўна.
У 1999 годзе арганізацыя "Карытас" Гродзенскай дыяцэзіі прайшла перарэгістрацыю і атрымала статус дабрачыннага каталіцкага таварыства, якое дзейнічае на тэрыторыі Гродзенскай вобласці.
З першых дзён сваёй дзейнасці разам з матэрыяльнай дапамогай "Карытас" аказвае і духоўную падтрымку. Вядзе праз сацыяльную кансультацыю прыём грамадзян, арганізуе адукацыйныя экскурсіі для дзяцей і моладзі, падтрымлівае людзей у цяжкай жыццёвай сітуацыі, займаецца сацыяльным суправаджэннем зняволеных і прафілактыкай правапарушэнняў, арганізуе адукацыйныя праграмы для павышэння кваліфікацыі сваіх супрацоўнікаў і валанцёраў. Заўсёды імкнецца працягнуць руку дапамогі і адгукнуцца на заклік падтрымаць шматдзетныя сем'і, дзяцей і людзей з абмежаванымі магчымасцямі, адзінокіх пажылых грамадзян, пенсіянераў і бяздомных. Актыўна супрацоўнічае з адукацыйнымі ўстановамі, дабрачыннымі фондамі і аб'яднаннямі, дапамагае бальніцам.
Першым дырэктарам “Карытас” быў кс. Анатоль Маркоўскі. Пазней на пасадзе яго змяніў кс. Антоній Дзям'янка. Затым абавязкі дырэктараў арганізацыі выконвалі кс. Рычард Якубец, кс. Антоній Абухоўскі, кс. Віталій Дабраловіч, кс. д-р Раман Рачко. З 2023 года “Карытас” узначальвае кс. Алег Пятрашка .
Ксёндз Віталій Дабраловіч нарадзіўся 31 сакавіка 1979 г. Паходзіць з парафіі Нараджэння Найсвяцейшай Панны Марыі ў Трабах (Іўеўскі дэканат).
Скончыў Вышэйшую духоўную семінарыю ў Гродне. 29 мая 2004 г. у гродзенскім катэдральным касцёле св. Францішка Ксаверыя прыняў прэзбітэрскае пасвячэнне, удзеленае біскупам Гродзенскім Аляксандрам Кашкевічам.
У 2004-2006 гг. быў вікарыем парафіі Спаслання Духа Святога ў Бярозаўцы (Навагрудскі дэканат).
У 2006-2015 гг. быў дырэктарам дабрачыннага каталіцкага таварыства “Caritas” Гродзенскай дыяцэзіі, у 2015-2021 гг. – дырэктарам Нацыянальнага дабрачыннага каталіцкага таварыства “Caritas”.
У 2021-2024 гг. быў дырэктарам Пастырскага цэнтра пры Канферэнцыі Каталіцкіх Біскупаў у Беларусі.
3 снежня 2024 г. прызначаны эканомам Гродзенскай дыяцэзіі на тэрмін пяці гадоў і дырэктарам Рэлігійнай місіі “Дабрачыннае каталіцкае таварыства Caritas” Гродзенскай дыяцэзіі.