2 лістапада, ва ўспамін усіх памерлых вернікаў, біскуп Гродзенскі Аляксандр Кашкевіч узначаліў святую Імшу на гродзенскіх гарадскіх могілках “Азот”.
На Эўхарыстыі сабраліся шматлікія вернікі, каб у гэты асаблівы дзень атачыць малітвамі душы сваіх блізкіх памерлых.
Звяртаючыся да вернікаў, іерарх адзначыў, што ў папярэдні дзень Касцёл перажываў радасную ўрачыстасць Усіх Святых. “Думкамі і сэрцам мы былі з тымі, хто ўжо шчаслівы, бо дасягнуў радасці прабывання ў еднасці і любові з Панам Богам у нябеснай айчыне”, – сказаў ён.
Другі ж дзень лістапада, працягваў біскуп, – дзень успаміну ўсіх памерлых, і гэты дзень схіляе да роздуму, да разважання над таямніцай жыцця і смерці.
“Нашы памерлыя нагадваюць нам сёння, што прамінае постаць гэтага свету і наша зямное жыццё накіроўваецца да сваёй мяжы”, – дадаў іерарх. Па словах біскупа, спачылыя ў гэты дзень асабліва нагадваюць усім, што час мінае беспаваротна, таму трэба добра выкарыстаць яго, і абвяшчаюць праўду, што ў жыцці пэўная толькі смерць.
Пасля Імшы адбылася жалобная працэсія праз могілкі. Падчас пяці стацый маліліся за памерлае духавенства, сваіх спачылых продкаў, усіх, хто пахаваны на гэтых могілках і іншых, а таксама за ўсіх ахвяраў апошніх войнаў і за душы, якія церпяць у чыстцы.
На заканчэнне працэсіі біскуп Кашкевіч падзякаваў вернікам за шматлікі ўдзел у супольнай малітве ў інтэнцыі памерлых, якія самі ўжо нічога не могуць зрабіць, але маюць патрэбу ў малітоўнай падтрымцы тых, хто жыве на зямлі.
Kс. Юрый Марціновіч
Фота: Ангеліна Марцішэўская
