16 мая ў г. Масты, у касцёле Маці Божай Тройчы Цудоўнай, прайшлі чарговыя рэкалекцыі для мужчын. Арганізатарам рэкалекцыі быў кс. Віктар Ханька, які таксама з'яўляецца духоўным апекуном сусветнай каталіцкай асацыяцыі Мужчыны Святога Юзафа ў Гродзенскай дыяцэзіі. Мужчын сабралася няшмат, 18 чалавек, але гэта былі тыя мужчыны, якія сапраўды шукаюць Бога, якія будуюць адносіны з Ім, якія хочуць і вучацца хадзіць у любові Божай, у рэшце рэшт, якія не хочуць больш гуляць у рэлігію, а жыць сапраўднай верай і быць сведкамі Езуса Хрыста.
Першапачаткова планавалася тэматыка рэкалекцыі - "Гасподзь кожны дзень". Па сутнасці яна такой і выйшла, але вось што цікава, асновай жа паслужыла тэма "Любові". Кс. Віктар правёў дзве лекцыі, а затым даў слова і мне. Мы не дамаўляліся з ім, пра што будзем казаць, але Гасподзь зрабіў у чарговы раз так, як Яму заўгодна. Ён проста даў нам аднолькавую мэту апавядання. Я таксама расказваў пра каханне, а хутчэй сведчыў аб тым, як Бог апошнія дні дзейнічаў у маім жыцці, і якое пытанне падняў у маіх разважаннях.
Кс. Віктар параўнаў прыклад нашых адносін з Богам і даверу да Яго на прыкладзе Абрагама. Калі здавалася ўжо, што Абрагам кожны дзень быў з Богам, Гасподзь выбраў яго, але Абрагам не заўсёды давяраў Яму. Так было з прыходам у Егіпет, калі Абрагам з-за боязі і недаверу Богу папрасіў сваю жонку Сару прадставіцца яго сястрой, а не жонкай. Усё было раскладзена нам па паліцах, і тыя рэчы, якія часта выслізгваюць нашай увазе падчас вывучэння Пісання, кс. Віктар падрабязна тлумачый. Нам таксама трэба навучыцца не толькі слухаць і чуць Госпада, але і давяраць Яму ва ўсіх аспектах нашага жыцця.
Таксама прыводзілася мноства асабістых сведчанняў, як з боку святара, так і іншых людзей. Асабістыя сведчанні заўсёды нясуць у сабе двайную сілу пранікнення ў нашае сэрца Божага слова або Яго дзеяння. Бо нездарма папа Францішак кажа сёння, што царква мае патрэбу не ў настаўніках, яна мае патрэбу ў сведках веры. Сведкамі веры сёння выступаюць не толькі святары, але і свецкія - мы з вамі. Часам гэта ў нас дрэнна атрымліваецца, але калі мы не будзем удасканальвацца і перастанем быць сведкамі Езуса, то нашы паходы раз у тыдзень на Імшу ператвараюцца проста ў гульню, гульню ў рэлігію. А Езус заклікаў нас сведчыць: «але калі атрымаце моц сышоўшага на вас Духа Святога, тады будзеце мне сведкамі (...) аж па край зямлі»(Дзеі 1: 8). Калі мы прынялі Духа Святога, то нашым абавязкам з'яўляецца рэалізацыя другой часткі верша.
Мы не павінны баяцца казаць і сведчыць пра тое, як Гасподзь дзейнічае ў нашым жыцці. Нам неабходна больш праслаўляць Яго ў псальмах і песнях, больш вывучаць Пісанне, у якім ёсць адказы на ўсе пытанні, умацоўваць свой дух праз пост і малітву, і нарэшце, хадзіць у любові Божай.
Пасля лекцый, як я ўжо пісаў вышэй, былі сведчанні братоў. Пасля быў сумесны і вельмі смачны абед (дзякуем спадарыне Вользе за яе паслугу), пасля была канферэнцыя ў стылі «пытанне-адказ», дзе кожны мог задаць любое пытанне і атрымаць на яго адказ. Затым была адарацыя з разважаннямі і падзякай, малітва праслаўлення. На завяршэнні была малітва; браты, падзяліўшыся на групы, маліліся адзін за аднаго. Гэта быў цудоўны момант, калі ты стаіш перад Хрыстом на каленях, адчуваеш моцныя братэрскія рукі на сваіх плячах, і ўсведамляеш вялікую сілу адзінства мужчынскай малітвы. Пасля кс. Віктар блаславіў нас Найсвяцейшым сакрамэнтам, і наступіла невялікая паўза перад святой Імшой. Падчас паўзы была магчымасць, прыняць сакрамэнт пакаяння, з якога многія ахвотна скарысталіся, і паядналіся з Богам.Ну і наступіў кульмінацыйны момант суботняга дня, святая Імша: літургія слова і вядома ж Эўхарыстыя.
Хацелася засяродзіць вашу ўвагу таксама на упадабаным гучанні песень праслаўлення і пакланення. Мужчынскія галасы разліваліся пад скляпеннямі храма з невялікім рэхам …Гэта дае адмысловы эфект. Эх, як жа не хапае мужчынскіх галасоў у нашых храмах. Сябры, мы "Мужчыны святога Юзафа" запрашаем вас на нашыя сустрэчы, якія праходзяць ужо ў трох парафіях нашага горада: у мікрараёне “Дзевятоўка”, на “Паўднёвым” і ў Фары. Таксама сустрэчы праходзяць і ў горадзе Лідзе ў фарным касцёле.
Гасподзь заклікаў мужчын быць святарамі ў сваіх дамах. Ці з'яўляемся мы такімі, ці аддаём мы сабе справаздачу ў гэтым?. У Мастах я ўбачыў 18 мужчын, якія ідуць у кірунку пазнання і рэалізацыі волі Божай у сваім жыцці: быць сведкам Бога, людзьмі веры, святарамі ў сем'ях, кахаючымі мужамі і бацькамі.
Мужчыны Святога Юзафа выказваюць вялікую ўдзячнасць кс. Віктару за яго душпастырства над намі, за яго старанні і арганізацыю рэкалекцыі. І чакаем новых выездаў, з новымі тэмамі і новымі сведчаннямі.
Аніматар Анатоль Канарскі.
(33) 68 58353 Лайф
kaihorse5@yandex.ru
