Каля тысячы вернікаў выйшлі на Крыжовы шлях вуліцамі Гродна, які ладзіла пасля вечаровай св. Імшы 12 красавіка моладзь з акадэмічнага душпастырства OPEN. Разважанні пра муку і смерць Езуса на крыжы пасярод цэнтральнай плошчы з’яўляюцца моцным і прыгожым сведчаннем веры перад іншымі гараджанамі.
А 19.00 у катэдральным касцёле св. Францішка Ксаверыя распачалася св. Імша, якую ўзначаліў дапаможны біскуп Гродзенскай дыяцэзіі кс. Юзаф Станеўскі. У гаміліі душпастыр многа разважаў пра Крыж і заклікаў “не баяцца, а дзяліцца тым Крыжам, што ў вашых сэрцах”.
Пасля св. Імшы моладзь з катэдральнай парафіі распачала Крыжовы шлях, узяўшы Крыж з фігурай укрыжаванага Езуса.
Спыняючыся на 14 прыпынках для разважанняў, па чарзе неслі Крыж вернікі з усіх парафій горада, а таксама клерыкі Гродзенскай Вышэйшай духоўнай семінарыі, больш за 40 юнакоў, якія ў гэты час перажываюць рэкалекцыі ў ВДС, студэнты з Афрыкі. Малітоўнае шэсце на фоне вечаровага горада выглядала сапраўды ўрачыста і прыцягвала да сябе ўвагу: фігура ўкрыжаванага Езуса, вернікі з запаленымі паходнямі і свечкамі, малітва і прыгожы спеў.
Разважалі пра Крыж Езуса і крыж штодзённых праблем і цярпенняў кожнага чалавека; пра адносіны з бацькамі; пра ахвярнасць і дапамогу бліжняму чалавеку; пра сэнс жыцця і смерці – пра ўсё тое, аб чым мы забываем штодня, спяшаючыся жыць. І такія набажэнствы прымушаюць спыніцца і задумацца, куды я бягу, а галоўнае, з якой мэтай?..
Паўтарагадзіннае шэсце скончылася ў Пабернардынскім касцёле. Кс. біскуп Юзаф асабліва падзякаваў кс. Антонію Грэмзе, ініцыятару правядзення Крыжовага шляху вуліцамі Гродна ўжо на працягу пяці годоў, а таксама ўсім вернікам за ўдзел, выказаў падзяку ахоўнікам правапарадку і супрацоўнікам ДАІ за дазвол і дапамогу ў правядзенні набажэнства.
Казанне кс. біскупа Юзафа Станеўскага падчас св. Ішшы
Марына Белаблоцкая
Фота: Вольга Сяліцкая і Марына Белаблоцкая
