22 сакавіка ў парафіі Божай Міласэрнасці (Вішнявец) ў Гродне адбыўся Дзень засяроджання для сем’яў. Сустрэчу праводзілі Норберт і Ася Давідчыкове - сужанская пара з Астралэнкі (Ostrołęka, Польшча), якія ўжо каля 7 гадоў дапамагаюць сем’ям праз рэкалекцыі і сужанскія сустрэчы.
У сустрэчы ўдзельнічалі 12 сем’яў з розным стажам сужанства: ад 5 месяцаў да 30 год. З бацькамі мелі магчымасць быць і дзеці, якімі займаліся выхаваўцы.
Дзень заяроджання пачаўся з супольнай малітвы, пасля была св. Імша. Пасля малітваў прайшлі канферэнцыі, практычныя заняткі і трэнінгі ў парах, дзе асаблівая ўвага была скіравана на дыялог сужанцаў, бо ў штодзённым жыцці, як высветлілася, часу, ахвоты на простую размову і вырашэнне канфліктаў не хапае. Таму муж і жонка пісалі адзін другому лісты з падзякай, маглі выявіць і паразмаўляць аб праблемах у іх сям’і, зрабіць пэўныя пастановы, задумацца аб выхаванні дзяцей. Гэтыя практыкі дазволілі сужанствам паспрабаваць аднавіць сваю любоў, прыпомніць момант іх спаткання і шлюбу, абраць далейшы кірунак развіцця іх сямейнага жыцця у Духу Божай Любові. Падчас малітвы перад Святымі Дарамі кожны мужчына ахвяраваў сваю сям’ю Езусу, пасвяціў Яго апецы.
Сустрэча завяршылася сяброўская гутаркай, сведчаннямі і вырашэннем аб неаднаразовым правядзенні дзён засяроджання і рэкалекцый для сем’яў.
Анжэла Кузікевіч
