4 сакавіка каталіцкі Касцёл ушаноўваў св. Казіміра. Гэты святы асабліва важны для Касцёла на Гродзеншчыне, бо з’яўляецца святым заступнікам нашай дыяцэзіі. Св. Імшу а 9 гадзіне ў фарным касцёле цэлебраваў кс. біскуп Юзаф Станеўскі. У той час на вул. Савецкай распачыналася традыцыйная выстава-ярмарка “Казюкі”.
На пачатку св. Імшы кс. Ян Кучынскі ўзгадаў, што св. Казімір памёр у Гродне, але “калі паміраюць святыя, то гэты дзень не называюць днём смерці, а днём нараджэння ў небе”. А. Казімір Жыліс ў гэты дзень адзначаў імяніны і Дзень нараджэння, менавіта з гэтай нагоды Літургію ўзначаліў кс. бп Юзаф Станеўскі, які скіраваў айцу езуіту шмат цёплых словаў падзякі за ўклад у яго пакліканне.
Падчас казання кс. біскуп згадваў жыццё св. Казіміра, які ў такім маладым ўзросце даваў прыклад сваёй веры і вёў людзей да Бога.
Яго Эксцэленцыя заклікаў прысутных маліцца да св. Казіміра, маліцца за моладзь, каб Бог праз яго заступніцтва даў ім патрэбныя ласкі. “Бо той, хто пазнаў Бога, Яго мудрасць – багацейшы, разумнейшы. Той, хто будуе дом без Бога, пабудуе яго, але потым убачыць, што Бога там няма. Гэта малады святы падказвае сённяшняй моладзі, куды ісці.”
Напрыканцы св. Імшы кс. Ян павіншаваў а. Казіміра з імянінамі і Днём нараджэння і падзякаваў за шчырую святарскую паслугу.
А тым часам горад пачынаў святкаванне сярэдневяковае свята - "Казюкі". А 10 гадзіне на вул. Савецкай народныя майстры з Беларусі, Польшчы, Літвы, Украіны і Расіі раскладвалі свае працы на сталах. Пачалося вяселле.
Каля моладзевага цэнтра “Гродна” выступалі народныя калектывы і ансамблі.
Вельмі хутка вуліца запоўнілася людзьмі, якія мітусілі ад прылаўка да прылаўка або проста шпацыравалі, разглядваючы вырабы з керамікі, саломкі, нітак, пер’яў, рагоў жывёл, бісеру, дрэва, скуры і інш.
Ад мноства красак разбягаліся вочы.
Старая верба ўжо занесена ў касцёл, а тут можна было набыць новыя прыгожыя вербы на Пальмовую нядзелю.
І незвычайныя яйкі, упрыгожаныя бісерам або з выявай Гродна.
Марына Белаблоцкая
