31 мая Павел Пастушын, які належыць да Ордэну духоўных рэгулярных убогіх Маці Божай пабожных школ (піяры), прыняў дыяканскае пасвячэнне ў парафіі Унебаўзяцця Найсвяцейшай Панны Марыі ў Лідзе (Індустрыяльны). Пасвячэнне ўдзяліў біскуп эмерыт Аляксандр Кашкевіч.
Пасвячэнне адбылося на Імшы, якую ўзначаліў біскуп. На літургіі прысутнічала вялікая колькасць парафіян і госці, у тым ліку настаяцель Польскай правінцыі
Ордэну піяраў а. Матэуш Піндэльскі, а таксама вернікі шчучынскай парафіі св. Тэрэзы ад Езуса, адкуль паходзіць новы дыякан.
Пра пасвячэнне нам паведамляюць, што ў парафіі гэта была “гістарычная падзея”.
У гаміліі біскуп падкрэсліў важнасць дыяканату. “Ты будзеш дыяканам – значыць слугой Езуса Хрыста, які сярод сваіх вучняў паступаў як слуга. Ахвотна выконваючы волю Бога, служы Богу і людзям у духу любові, з радасцю”, – з такімі словамі ён звярнуўся да маладога піяра, які прымаў пасвячэнне.
Біскуп пажадаў яму, каб ён быў “заўсёды напоўнены Святым Духам і мудрасцю” і, “натхнёны шчырай любоўю да Хрыста, заўсёды хацеў жыць у стане поўнай адданасці Яму”.
“Будзь моцна ўкаранёны ў веры, непахісны і беззаганны перад Богам і людзьмі, як належыць слузе Хрыста і распарадчыку Божых сакрамэнтаў”, – дадаў іерарх.
У канцы літургіі дыякан выказаў усім яе ўдзельнікам падзяку за прысутнасць у гэты дзень, які ён назваў важным для яго самога і для Ордэну піяраў. Таксама ён падзякаваў за малітоўную падтрымку і папрасіў працягваць яе, каб, як было сказана, ён мог адпавядаць той задачы, якую паставілі перад ім Касцёл і ордэн.
Прэс-служба Гродзенскай дыяцэзіі
