8 верасня ў парафіі Нараджэння Найсвяцейшай Панны Марыі ў Зарачанцы (Баля Касцёльная) адзначалася адпустовая ўрачыстасць тытулу касцёла.
У гэты дзень шматлікія мясцовыя вернікі і госці дзякавалі Пану за дар парафіі.
Сёлета адзначаецца 95-я гадавіна ўтварэння зарачанскай парафіяльнай супольнасці і 85-я гадавіна пабудовы святыні. Парафія была заснавана ў 1927 г., каменны касцёл будаваўся ў 1934-1937 гг. на сродкі кс. Антонія Баршчэўскага і парафіян.
Па запрашэнні пробашча кс. прэлата Вітальда Лазавіцкага на юбілейную ўрачыстасць прыбылі біскуп Гродзенскі Аляксандр Кашкевіч і святары. Прысутнічалі прадстаўнікі мясцовай улады, а таксама ахвярадаўцы і спонсары, дзякуючы якім ёсць магчымасць правядзення пры парафіі рамонтных і будаўнічых прац.
Біскуп цэлебраваў Імшу ў інтэнцыі ўсіх, хто ўтварае парафіяльную сям'ю, тых, хто стаяў ля пачаткаў утварэння парафіі, будаўніцтва касцёла, хто прычыняўся да таго, каб святыня была прыгожай.
Зарачанскі касцёл, які сёння з'яўляецца помнікам архітэктуры з рысамі неаготыкі, мае багатую гісторыю, у якой былі і трагічныя падзеі. У 1969 г. святыня была зачынена і ператворана ў зернясховішча. Вернікі трымалі галадоўку ў інтэнцыі вяртання касцёла, але яго ім не аддалі. У 1970 г. католікі не выйшлі на працу ў калгас, патрабуючы, каб святыня не была зернясховішчам, але ўлады вярнулі ім будынак касцёла толькі праз 19 гадоў.
Біскуп Кашкевіч заахвоціў усіх прысутных на ўрачыстай Эўхарыстыі дзякаваць Богу за ўсе дары і ласкі, якія яны атрымалі ад Яго, наведваючы святыню.
У гаміліі кс. канонік Ян Кучынскі казаў пра свята Нараджэння Найсвяцейшай Панны Марыі, тытул якога мае зарачанскі касцёл. Святар заклікаў звяртацца да Маці Божай, жаданне якой – каб Яе Сын Езус Хрыстус кожны дзень нараджаўся ў сэрцах людзей.
Таксама на Імшы прысутныя дзякавалі Пану за сёлетні ўраджай. У межах сваёй удзячнасці яны прынеслі ў святыню дажынкавыя вянкі, якія благаславіў пастыр Касцёла на Гродзеншчыне.
Акрамя таго, удзельнікі ўрачыстасці павіншавалі пробашча кс. прэлата Вітальда Лазавіцкага з днём нараджэння.
Свята завяршылася эўхарыстычнай працэсіяй вакол касцёла і спевам гімну Te Deum laudamus, якім прысутныя дзякавалі Богу за ўсе дары і ласкі, атрыманыя за апошнія 95 гадоў вернікамі гэтай парафіяльнай супольнасці.
Прэс-служба Гродзенскай дыяцэзіі
Фота: Аліцыя Габіс