Спартыўны летнік для моладзі розных парафій быў арганізаваны ў Слоніме

10 Жніўня 2022

letnik 40 Моладзь парафій Гродна, Глыбокага, Мастоў, Слоніма і Баранавіч прыняла ўдзел у спартыўным летніку, які праводзіўся ў Слоніме.

Акрамя арганізатара – адказнага па справах спорту ў Гродзенскай дыяцэзіі кс. Артура Малафея – і апекуноў, спартыўную частку летніку праводзілі на прафесійным узроўні трэнеры футбольных клубаў “Слонім” і “Лакаматыў” (Гомель).

Удзельнікаў мерапрыемства прымала слонімская парафія Беззаганнага Зачацця Найсвяцейшай Панны Марыі. Духоўным пасілкам для іх былі штодзённая святая Імша і Вяночак да Божай Міласэрнасці.

letnik 43

Моладзь штодня мела магчымасць паспрабаваць свае сілы ў прафесійных футбольных трэніроўках, а таксама згуляць у футбол на галоўных арэнах Слоніма – Навагрудка – Нясвіжа.

Шмат пазітыўных эмоцый удзельнікам прынеслі гульня ў настольны тэніс, эстафета на тэрыторыі МНС, пляжны футбол на беразе возера.

У межах адпачынку моладзь удзельнічала ў эскурсіі ў Навагрудак, Уселюб і Нясвіж. Хлопцы і дзяўчаты наведалі каталіцкія святыні і Нясвіжкі замак.

На заканчэнне летніку ўсе ўдзельнікі атрымалі падарункі – спартыўную экіпіроўку.

Маладыя людзі дзякуюць усім спонсарам за дапамогу ў арганізацыі мерапрыемства.