Біскуп Кашкевіч удзяліў сакрамэнт канфірмацыі вернікам парафіі ў Шылавічах

18 ліпеня сакрамэнт хрысціянскай сталасці з рук біскупа Гродзенскага Аляксандра Кашкевіча прынялі вернікі парафіі Найсвяцейшай Тройцы ў Шылавічах (Ваўкавыскі дэканат). Да сакрамэнту прыступілі 60 чалавек.

Іерарх узначаліў у велічным касцёле святую Імшу, падчас якой асаблівым чынам маліўся за тых, хто прымаў у гэты дзень дары Духа Святога ў канфірмацыі.

Перад прыняццем сакрамэнту кандыдаты супольна адказалі, якіх дароў чакаюць ад Бога, і аднавілі абяцанні хросту.

Пасля адмысловай малітвы іерарх удзяліў сакрамэнт, робячы знак крыжа на чале кожнага з тых, хто яго прымаў.

Біскуп заахвоціў вернікаў, асабліва моладзь, каб для іх не прамінулі дарма самыя цудоўныя гады іх жыцця, а каб яны былі для сучаснага свету, які часта жыве так, быццам Бога не было, жывым Евангеллем.

Іерарх пажадаў маладым людзям, каб Дух Святы, якога яны прынялі ў гэтым сакрамэнце, перамяняў іх жыццё і дапамагаў ім кожны дзень быць сапраўднымі сведкамі ў сваім асяроддзі, на месцах працы ці вучобы.

На заканчэнне Эўхарыстыі пробашч парафіі кс. Мар’ян Хаменя SCMA падзякаваў пастыру Гродзенскай дыяцэзіі за прыбыццё і дар супольнай малітвы.

Кс. Юрый Марціновіч

Фота: Яўгенія Бердзік