Яна вядзе, Яна раіць, Яна спрыяе, Яна абараняе, бо для нас Яна адкрывае сваё мацярынскае сэрца і, стараючыся дзеля нашага збаўлення, клапоціцца пра ўвесь чалавечы род. У гарадзенскай галерэі “Крыга” адкрылася выстава, прысвечаная Панне Марыі, Маці міласэрнасці і ласкі.Вядомы гарадзенскі мастак Станіслаў Кічко прадставіў дванаццаць карцін, у якіх праз вобраз Найсвяцейшай Панны Марыі адлюстраваў светлы вобраз маці і веліч мацярынскай любові.
“Езус з Крыжа на Галгоце вызначыў Марыі заданне – быць Маці для ўсіх людзей. Тым самым Збаўца ўказаў усяму чалавецтву Марыю як надзейную дапамогу і найкарацейшы шлях да збаўлення, – гаворыць Станіслаў Кічка. – Таму ў сваіх працах тэму матчынай ласкі і любові я раскрыў праз прызму мацярынства Панны Марыі, якая няспынна аказвае ўсяму чалавецтву сваё спачуванне ў кожнай небяспецы, уціску, патрэбе, у складаных і пагрозлівых становішчах”.
Марыя Мацко, уласніца галерэі, у сваю чаргу зазначыла, што працы Станіслава Кічко выразна сведчаць аб тым, што мастак пісаў іх не толькі фарбамі, але таксама сэрцам і глыбокаю вераю.
“Ён здолеў паказаць розныя бакі тэмы мацярынства, такой пяшчотнай і драматычнай, узвышанай і тонкай”, – падкрэсліла Марыя Мацко.
Вернісаж адбыўся напярэдадні Вялікадня. Станіслаў Кічко прысвяціў сваю выставу чысціні і свету, што нясе гэтае вялікае свята, а таксама дзвюм іншым важным падзеям: 20-годдзю Гродзенскай дыяцэзіі і Хрышчэнню Польшчы.
Варта адзначыць, што Станіслаў Кічко перш за ўсё спецыялізуецца ў маляванні касцёлаў Гарадзеншчыны. Тэма аднаўлення, уваскрашэння і жыцця святыняў паступова стала яго жыццёвым арыенцірам, з якім звязаны індывідуальныя прэзентацыі апошніх гадоў. Мастак меў гонар перадаць свае працы Папу Яну Паўлу II, кардыналу Казіміру Свёнтэку, арцыбіскупу Тадэвушу Кандрусевічу і біскупу Аляксандру Кашкевічу.
Працы мастака будуць экспанавацца ў галерэі “Крыга” да 6 мая.
