25 студзеня, ва ўрачыстасць навяртання св. Паўла, вернікі парафіі Галынка дзякавалі Богу за паслугу кс. пробашча Паўла Гедройця. Гэты дзень быў асаблівы для душпастыра. Па-першае, ва ўрачыстасць св. Паўла кс. Павел святкаваў Дзень нараджэння і імяніны. Па-другое, у гэты дзень адбылася ўрачыстая перадача абавязкаў дзекана дэканата Тэалін-Сапоцкін ад кс.пралата Вітальда Лазавіцкага пробашчу Галынкі, якога кс. бп Аляксандр прызначыў новым дзеканам. На ўрачыстую св. Імшу прыбылі святары з дэканата, Гродна і ваколіцаў, было таксама мноства вернікаў.Кс. дзекан Павел так звярнуўся да прысутных: “Мы ўсе – адна сям’я, таму я прашу вас аб малітве і дапамозе мне ў выконванні абавязкаў дзекана”. Падчас гаміліі а. Юзаф Макарчык OFMConv заахвоціў кс. Паўла весці дыялог з кожным чалавекам па ўзоры св. Апостала. Напрыканцы Эўхарыстыі кс. рэктар Юзаф Станеўскі прачытаў вернікам дэкрэт пастыра дыяцэзіі пра прызначэнне новага дзекана і патлумачыў, што ўваходзіць у яго абавязкі. Пасля таго, як былі падпісаны неабходныя дакументы, святары і вернікі склалі новаму дзекану шчырыя пажаданні. У гэты дзень разам з кс. Паўлам маліліся яго мама і сястра. Кс. Павел – сёмае дзіця ў сям’і. Жадаем кс.дзекану плённай апостальскай працы па ўзоры св. Паўла, Апосталаў народаў.
