20 чэрвеня, другі дзень Парафіяды дзяцей і моладзі Гродзенскай дыяцэзіі, завяршыўся ўручэннем узнагарод у некаторых конкурсах.
У гродзенскай парафіі Найсвяцейшага Адкупіцеля вечарам адбылася так званая “дэкарацыя пераможцаў”, падчас якой найлепшым удзельнікам былі ўручаны медалі, дыпломы і кубкі.
З вялікай засяроджанасцю ўдзельнікі Парафіяды чакалі абвяшчэння прозвішчаў пераможцаў, пасля былі гучныя апладысменты і вялікая радасць.
Акрамя конкурсаў па веданні Бібліі і гісторыі Касцёла, у гэты дзень адбыліся спаборніцтвы па валейболе, якія праходзілі ў сярэдняй школе №36 з польскай мовай навучання. Некаторыя прынялі ўдзел у спаборніцтвах па плаванні, якія прайшлі ў камунальным фізкультурна-аздараўленчым унітарным прадпрыемстве "Аквацэнтр".
У праграме дня была таксама адарацыя Найсвяцейшага Сакрамэнту, а завяршылася ўсё забаўляльнай праграмай.
Кс. Юрый Марціновіч
