18 чэрвеня ў парафіі Св. Мікалая, біскупа ў Геранёнах адбылася ўрачыстасць Божага Цела. Штогод у гэтае вялікае свята адбываецца працэсія па вуліцах аграгарадка. Сёлетняй адметнасцю стала тое, што ў гэты час парафія вітала фігуру Маці Божай Фацімскай, перэгрынацыя якой зараз праходзіць у Гродзенскай дыяцэзіі.
Перад урачыстасцю Найсвяцейшага Цела і Крыві Езуса Хрыста ў парафіі адбылося начное чуванне, падчас якога геранёнскія вернікі выпрошвалі ў Маці Божай патрэбныя ласкі для сваіх сем'яў, блізкіх і родных, а таксама для ўсёй краіны.
Пасля ўрачыстай нядзельнай Імшы адбылася працэсія з Найсвяцейшым Сакрамантам. Падчас шэсця жанчыны з гонарам неслі фігуру Марыі па вуліцах Геранён.
Парафія Св. Мікалая стала апошнім месцам перэгрынацыі Маці Божай у Іўеўскім дэканаце. Мясцовымі вернікамі фігура Маці Божай Фацімскай была перавезена ў парафію ў Гальшанах Ашмянскага дэканата.
Анастасія Мішкура
