5 сакавіка, у другі дзень свайго прабывання ў Гродне, Апостальскі Нунцый у Беларусі арцыбіскуп Габар Пінтэр сустрэўся са студэнтамі-католікамі з Афрыкі і Азіі ў рэктаральным касцёле Звеставання Найсвяцейшай Панны Марыі.
Спатканне Апостальскага Нунцыя са студэнтамі католікамі з Афрыкі і Азіі
У ходзе сустрэчы арцыбіскуп памаліўся разам з прысутнымі.
Нунцый сказаў, што вельмі рады сустрэць гэтых студэнтаў не ў Афрыцы, а тут, у Гродне. Іерарх назваў вельмі важным тое, што “паміж намі, людзьмі розных краін, ёсць сяброўства і ўзаемаразуменне”.
Таксама арцыбіскуп распавёў аб тым, кім з’яўляецца Апостальскі Нунцый і якія яго абавязкі.
Прадстаўнік Святога Айца дадаў, што прабывае ў Гродна для таго, каб лепш пазнаёміцца з Касцёлам і людзьмі, і вельмі рады, што падчас яго візіту ў горад была запланавана гэтая сустрэча са студэнтамі-іншаземцамі, адзначыўшы, што гэта багацце Касцёла.
Па словах арцыбіскупа Габара Пінтэра, Касцёл у Беларусі прайшоў цяжкія часы, калі вера пераследвалася, і вялікі цуд, што сёння Касцёл у нашай краіне вельмі дынамічна адраджаецца.
Апостальскі Нунцый заклікаў клапаціцца аб сваёй веры, каб не страціць яе, а развіваць, нават калі знаходзімся ў іншай краіне.
На заканчэнне адбылася супольная малітва і благаслаўленне.
(JM), (AG)
