1 сакавіка Папяльцовай серадой пачаўся чарговы Вялікі пост. Для хрысціян гэта час пакаяння, калі Касцёл асаблівым чынам заклікае да практыкавання ўчынкаў, якія служаць навяртанню сэрцаў.
У гэты дзень біскуп Гродзенскі Аляксандр Кашкевіч узначаліў святую Імшу ў катэдральным касцёле св. Францішка Ксаверыя ў Гродне. На пачатку Імшы біскуп пажадаў прысутным, каб саракадзённы час велікапоснага пакаяння стаў добрай нагодай яшчэ больш наблізіцца да Бога, багатага міласэрнасцю, абвяшчаць і спаўняць яе ў дачыненні да ўсіх, хто ў патрэбе.
Іерарх заахвоціў да таго, каб у велікапоснай чуйнасці была малітва, захаванне посту і адкрыццё сэрцаў на патрэбы братоў. Таксама гродзенскі ардынарый заклікаў да разважання ў гэты час над Божым словам і ўзірання разам з Маці Божай у крыж Збаўцы, каб на заканчэнне гэтага перыяду з чыстым сэрцам і адноўленым духам перажываць радасць велікодных святаў.
Гамілію прамовіў кс. Аляксандр Мацкевіч, натарыус Гродзенскай курыі. Святар нагадаў, што перыяд Вялікага посту – духоўная падрыхтоўка да ўрачыстасці Уваскрасення Пана.
“Наша зямное жыццё прамінае, таму належыць больш клапаціцца аб тым, што з’яўляецца непрамінальным, аб справах вечнасці”, - сказаў кс. Мацкевіч, дадаўшы, што Бог паклікаў кожнага чалавека да вечнага жыцця.
Па словах святара, час посту павінен стаць часам навяртання для кожнага, значыць прызнання ў граху, усведамлення, што мы маем патрэбу ў Божай міласэрнасці і прабачэнні, узбуджэння ў сабе суму па жыцці ў ласцы і сяброўстве з Богам.
Святар нагадаў таксама пра той належны кірунак, якім з’яўляюцца тры пакутныя практыкі: малітва, пост і міласціна – сродкі, якія павінны дапамагчы чалавеку ў аднаўленні адносін з Богам.
Прамаўляючы словы «Навяртайцеся і верце ў Евангелле», біскуп Аляксандр Кашкевіч здзейсніў абрад пасыпання галоваў вернікаў попелам.
Пасыпанне галоваў попелам на пачатку Вялікага посту – заклік да пакаяння і навяртання. Попел указвае на тое, што ўсё матэрыяльнае і часовае прамінае, а Бог з’яўляецца вечным, Ён адарыў людзей несмяротнай душой і абяцаў вечнае шчасце ў небе.
Кс. Юрый Марціновіч
Фота: Ангеліна Пакачайла
