Супольная малітва на ружанцы праз скайп з’яднала моладзь з парафій Гродна, Ашмян, Ліды і Шчучына 31 кастрычніка. Малітоўную сустрэчу ў пабрыгіцкім касцёле прымеркавалі да заканчэння месяца малітвы на ружанцы, да Свята Усіх Святых і Года веры.
Вернікі з моладзевага душпастарства “Open” як галоўныя арганізатары пасля св. Імшы распачалі сустрэчу малітвай і прадстаўленнем інтэнцый на ружанцы: за моладзь усёй Беларусі, аб паглыбленні веры і адвагі ў вызнаванні веры і інш.
Над Таямніцамі па чарзе разважалі маладыя вернікі з розных парафій Гродна, Ашмян, Шчучына и Ліды. У малітоўнай сустрэчы ўдзельнічалі і разважалі таксама маладыя сем’і з акадэмічнага душпастарства пры пабрыгіцкім касцёле.
У Гродне да супольнага ружанца праз скайп заахвоціў кіраўнік АД “Open” кс. Антоні Грэмза, яго ідэю падтрымала і арганізавала моладзь. У Ашмянах моладдзю на малітоўнай сустрэчы апекаваўся кс. Валеры Аброшка, у Лідзе-Фары – кс. Уладзіслаў Сурвіла, у Шчучыне – а. Вітольд Пятэльчыц.
Па словах кс. Антонія Грэмзы, сёлетняя сустрэча была вельмі добра наладжана з тэхнічнага боку, бо скайп мае больш магчымасцей злучацца на адлегласці без перашкод.
- Інтэрнет мае магчымасць стварыць умовы для лепшай камунікацыі паміж вернікамі, а ў выніку паміж вернікамі і Богам. Такая сучасная камунікацыя можа быць прасторай для малітвы, для моладзі гэта асабліва важна, - дадаў святар.
Напрыканцы разважанні былі напоўнены хвілінамі цішыні, а пасля душпастары блаславілі моладзь.
Малітоўная сустрэча такога кшталту ладзілася ўжо другім разам. У мінулым годзе моладзь праводзіла ружанец праз тэлефон у катэдры, з’яднаўшы ў малітве вернікаў з 5 гарадоў. Арганізатары супольнай малітвы на ружанцы плануюць праводзіць такую ініцыятыву раз на месяц па суботах у розных парафіях Гродзенскай дыяцэзіі, калі будзе магчыма, сумесна з парафіямі і з іншых дыяцэзій.
Здымкі Андрэя Міскевіча
