Пра скарбы Ружанца разважалі дзеці на “Канікулах з Богам” у гродзенскай парафіі бл. Мар’яны Бярнацкай

З 11 па 15 жніўня ў гродзенскай парафіі благаслаўлёнай Мар’яны Бярнацкай прайшлі “Канікулы з Богам” для дзяцей.

На канікулах, дэвізам якіх былі словы “Рупліва маліцеся Ружанец”, сабралося больш за 80 дзяцей.

У праграме кожнага дня была канферэнцыя на тэму аб’яўленняў Панны Марыі ў розных месцах свету, у якіх Маці Божая настойліва прасіла здзяйсняць штодзённую малітву на ружанцы. Затым дзеці працавалі ў групах. Кульмінацыйным момантам дня была Эўхарыстыя, якую цэлебраваў пробашч парафіі кс. канонік Юрый Марціновіч.

У межах канікул дзеці здзейснілі пілігрымку ў суседнюю парафію ў Падлабенні, дзе знаходзіцца касцёл Маці Божай Ружанцовай.

Час канікул прайшоў для ўдзельнікаў вельмі хутка. Ён быў насычаным, дні былі напоўнены як малітвай, так і забавамі. Садзейнічала гэтаму праграма, падрыхтаваная сёстрамі і вернікамі парафіі.

Арганізатары канікул спадзяюцца, што гэты час пакіне ў сэрцах малодшых парафіян след, які ў будучыні прынясе плён добрага жыцця, напоўненага Богам і асаблівай любоўю да ружанцовай малітвы.

Прэс-служба Гродзенскай дыяцэзіі

Фота: Артур Антушэвіч