27 красавіка ў Вышэйшай духоўнай семінарыі ў Гродне прайшлі адарацыя Найсвяцейшага Сакрамэнту і канцэрт семінарыйнага музычнага гурта “Ave”.
Гэты вечар быў непадобны на звычайныя суботы ў семінарыйнай супольнасці. Капліца навучальнай установы была поўная людзей, якія сабраліся для ўдзелу ў адарацыі. Гэта былі як семінарысты, так і не звязаныя з семінарыяй асобы – у большасці моладзь, як з Гродна, так і з яго ваколіц. Некаторыя прыбылі са сваімі душпастырамі.
Семінарысты падрыхтавалі для адарацыі разважанні на тэму паклікання, якія суправаджаліся песнямі. Таксама былі хвіліны цішыні для асабістай размовы з Богам.
Удзельнікі адзначаюць, што адчувалі ў сумеснай малітве адзінства і моц Касцёла. “Было вельмі прыемна! Гадзіна з Езусам прайшла ў імгненне вока”, – распавядаюць яны.
Некаторым запомнілася маладая сям’я, якая прыйшла на адарацыю з маленькім дзіцем. Размясціўшыся ў канцы капліцы, яны правялі ўвесь час адарацыі на каленях, і дзіця, як падалося, адчувала сябе ўтульна.
Пасля адарацыі ў зале Яна Паўла ІІ адбыўся канцэрт гурта “Ave”. Гледачы маглі спяваць разам з музыкантамі, праслаўляючы Бога, і нават танцаваць.
Семінарысты вельмі рады гэтай падзеі і ўдзячныя за яе Богу, кажучы, што такім чынам Ён адкрываецца ім як любячы Айцец.
Віталій Стасюкевіч, прэс-служба Гродзенскай дыяцэзіі
Фота: Станіслаў Бервячонак
