З 3 па 5 студзеня ў Навагрудку адбылася калядная сустрэча маладых людзей з парафіі Узвышэння Святога Крыжа ў Лідзе (Фара).
Гэтая паездка, якая праходзіла ў час святаў, калі часта людзі забываюцца спыніцца і сцішыцца ў святочнай мітусні, стала для ўдзельнікаў магчымасцю добрага адпачынку і падрыхтоўкі да таго новага, што прыносіць новы год.
Разам з моладдзю ў паездцы былі вікарый лідскай парафіі кс. Дзмітрый Малец і семінарыст Віталій.
У межах сустрэчы быў час не толькі для адпачынку, але і для духоўнага развіцця. Галоўнай часткай кожнага дня была святая Імша, таксама адбываліся малітва Вяночка да Божай Міласэрнасці і малітва Ружанца. Адзін з вечароў быў прысвечаны адарацыі, дыялогу з Богам сам-насам у цішыні сэрца. Заўсёды была магчымасць споведзі.
Праграма сустрэчы была насычанай. У першы дзень удзельнікі правялі “італьянскі вечар”, гатуючы піцу. Маладыя людзі пабывалі на цікавай экскурсіі ў мясцовым касцёле, гулялі ў валейбол, проста былі разам. Самае прыемнае ўражанне пакінулі размовы за кубкам гарбаты, настольныя гульні, сумесныя песні і танцы.
Усе гэтыя моманты дапамагалі стварыць у моладзевай супольнасці сямейную атмасферу.
Дзіяна Бранчэль, прэс-служба Гродзенскай дыяцэзіі
Фота: Вікторыя Мікавоз, Елізавета Бобрык, кс. Дзмітрый Малец