У апошнія гадзіны 2023 года хочам узгадаць памерлых святароў і законных сясцёр, якія служылі ў нашым мясцовым Касцёле нядаўна або нейкі час раней.
Хочам дзякаваць у малітве Добраму Богу за іх адданае служэнне ў Гродзенскай дыяцэзіі, просячы для іх дару вечнага жыцця.
Ксёндз Эрнэст Будын SCJ: з усмешкай праз жыццё
14 красавіка ў Тухуве (Польшча) адышоў у вечнасць кс. Эрнэст Будын, сэрцанін, які з 1990 па 2013 г. служыў у Гродзенскай дыяцэзіі.
У час служэння ў нашай краіне ён удзельнічаў ва ўтварэнні структуры мясцовай супольнасці сэрцанаў, быў пробашчам парафіі св. Станіслава, біскупа і мучаніка, у Ляцку (Шчучынскі дэканат), затым парафіі Божай Міласэрнасці ў Гродне (Вішнявец).
Ксёндз Станіслаў Лугоўскі SDB: чалавек пакоры
31 мая ў Польшчы на 82-м годзе жыцця, 62-м манаскага жыцця і 51-м святарства адышоў у вечнасць кс. Станіслаў Лугоўскі SDB, які чвэрць стагоддзя нёс служэнне ў Беларусі.
У 1991 г. ён пачаў сваё служэнне з Гродзенскай дыяцэзіі – у Ашмянах, Бердаўцы і Лідзе.
Ксёндз прэлат Антоні Філіпчык: ціхі і пакорны
9 ліпеня адышоў у вечнасць кс. прэлат Антоні Філіпчык, які шмат гадоў быў пробашчам парафіі св. Вацлава ў Ваўкавыску.
У лістападзе 1988 г. ён прыбыў у Ваўкавыск. Быў дэканам Ваўкавыскага дэканату і пробашчам парафіі св. Вацлава да самай смерці. Адышоў у вечнасць 9 ліпеня.
Сястра назарэтанка Пэтранэля Перашчака: не расставалася з ружанцам
7 жніўня ў Гродне адышла ў вечнасць с. Пэтранэля ад Езуса Міласэрнага (Станіслава Перашчака) з супольнасці назарэтанак.
На працягу манаскага жыцця служыла ў Варшаве, Закапанэ, Астшэшуве (Польшча), Друскінінкаі (Літва), Лідзе і Гродне.
Ксёндз Веслаў Дамброўскі: не баяўся фізічнай працы
21 жніўня ў Быдгашчы (Польшча) на 87-м годзе жыцця і 61-м святарства адышоў у вечнасць кс. Веслаў Дамброўскі SDB.
Служыў у парафіі Беззаганнага Зачацця Найсвяцейшай Панны Марыі ў Лідзе. З 1994 па 2015 г. быў пробашчам парафій Найсвяцейшага Сэрца Пана Езуса ў Наваельні і Божага Цела ў Дварцы (Дзятлаўскі дэканат).
Ксёндз канонік Здзіслаў Вэдэр SDB: сапраўдны айцец
11 лістапада на 87-м годзе жыцця і 61-м святарства ў Варшаве адышоў у вечнасць кс. канонік Здзіслаў Вэдэр, салезіянін.
Большую частку жыцця ён прысвяціў служэнню парафіі св. Міхала Арханёла ў Смаргоні, дзе выконваў абавязкі настаяцеля манаскай супольнасці і пробашча парафіі, а ў апошні час – вікарыя.
Ксёндз Рышард Чайка SChr: руплівы душпастыр
20 снежня ў Польшчы ва ўзросце 59 гадоў адышоў у вечнасць кс. Рышард Чайка, які належаў да Таварыства Хрыста (хрыстусоўцы) для палякаў-эмігрантаў.
Служыў у катэдральнай парафіі св. Францішка Ксаверыя ў Гродне, затым у парафіі святых Пятра і Паўла ў Іўі.
З 1997 да 2007 г. быў пробашчам парафіі св. Мікалая ў Геранёнах (Іўеўскі дэканат).
Прэс-служба Гродзенскай дыяцэзіі
