Kаляндарны год, які падыходзіць да заканчэння, заўсёды з’яўляецца нагодай зрабіць падсумаванне таго, што ўдалося здзейсніць на працягу гэтых 365 дзён. Канец года – заўсёды таксама нагода падзякаваць Пану Богу за ўсё тое дабро, якое мы атрымалі. А ў нас, безумоўна, ёсць за што дзякаваць!
Мы перажылі столькі радасных хвілін і момантаў. Столькі дабра атрымала кожная сям’я i кожны з нас.
Каталіцкі Касцёл на Гродзеншчыне таксама мае шмат прычын для радасці і ўдзячнасці Богу. Гэта быў год насычаных падзей, юбілеяў, сустрэч і рэалізацыі шматлікіх душпастырскіх праектаў, якія назаўсёды ўпісаліся ў гісторыю мясцовага Касцёла.
Дзякуючы Пану за ўсе гэтыя падзеі, хочам нагадаць некаторыя з іх i яшчэ раз вярнуцца да гэтых радасных хвілін.
Залаты юбілей найстарэйшай назарэтанкі
7 студзеня ў доме Кангрэгацыі Найсвяцейшай Сям’і з Назарэта ў Гродне адзначыла юбілей 50-годдзя манаскага жыцця сястра Тэрэза Касінская.
30 студзеня 1973 г. яна адказала Богу “так” на Яго заклік, просячы ўладу Кангрэгацыі сясцёр назарэтанак прыняць яе ў гэтую супольнасць.
Асвячэнне двух алтароў у Канвелішках
15 красавіка біскуп Гродзенскі Аляксандр Кашкевіч наведаў парафію Найсвяцейшага Сэрца Пана Езуса ў Канвелішках (Радунскі дэканат), дзе здзейсніў асвячэнне двух новых алтароў.
Адзін з іх прысвечаны св. Ганне, маці Найсвяцейшай Панны Марыі, другі – св. Мікалаю, біскупу, які шмат гадоў з’яўляецца апекуном гэтай парафіяльнай супольнасці.
Канфірмацыя ў Лідзе, якую нунцый удзяліў першы раз
16 красавіка, у нядзелю Божай Міласэрнасці, Апостальскі нунцый у Беларусі арцыбіскуп Антэ Ёзіч наведаў Ліду. У парафіі Божай Міласэрнасці на адпустовай урачыстасці ён удзяліў сакрамэнт канфірмацыі.
“Для мяне гэта першы раз, калі я як біскуп удзяляю канфірмацыю, і я шчаслівы, што гэта адбываецца тут, у Лідзе”, – адзначыў іерарх.
Асвячэнне фундамента будучага касцёла ў Абухаве
22 красавіка біскуп Гродзенскі Аляксандр Кашкевіч асвяціў фундамент будучага касцёла благаслаўлёнага кс. Міхала Сапоцькі ў Абухаве недалёка ад Гродна (дэканат Гродна-Усход).
Таксама іерарх асвяціў і ўмураваў у фундамент два вуглавых каменя, прывезеныя з радзімы апекуна парафіі бл. Міхала Сапоцькі – вёскі Навасады Валожынскага раёна: адзін – з дома, дзе ён нарадзіўся, другі – з прыступак касцёла, дзе ён быў ахрышчаны.
Асвячэнне касцёла ў Юбілейным
27 чэрвеня, у літургічны ўспамін Маці Божай Нястомнай Дапамогі, адбылося асвячэнне касцёла пад гэтым тытулам у аграгарадку Юбілейны (Мастоўскі дэканат).
Парафіяльная супольнасць налічвае каля 200 вернікаў.
Адраджэнне пілігрымкі Гродна-Тракелі
Пасля трох гадоў перапынку ў 25-ы раз вырушыла пешая пілігрымка з Гродна ў дыяцэзіяльны санктуарый Маці Божай Каралевы нашых сем’яў у Тракелях (Радунскі дэканат).
У шлях да Маці Божай адправіліся больш за 200 вернікаў, найстарэйшы – ва ўзросце 77 гадоў.
Спецвыпуск газеты “Слова Жыцця”
На дыяцэзіяльныя ўрачыстасці ў Тракелях быў выдадзены спецвыпуск газеты Гродзенскай дыяцэзіі “Слова Жыцця”.
Выпуск быў цалкам прысвечаны санктуарыю Маці Божай Каралевы нашых сем’яў у Тракелях. Газету можна было набыць ва ўсіх парафіях дыяцэзіі і на ўрачыстасцях у Тракелях.
80-годдзе мучанікаў ІІ Сусветнай вайны
15 ліпеня на фартах у Навумавічах каля Гродна адбыліся ўрачыстасці, прысвечаныя 80-й гадавіне мучаніцкай смерці благаслаўлёнай Мар’яны Бярнацкай і іншых мучанікаў Другой сусветнай вайны.
У канцы ліпеня 80-годдзе з часу мучаніцкай смерці манахінь Кангрэгацыі Сясцёр Найсвяцейшай Сям’і з Назарэта адзначылі ў Батароўскім лесе пад Навагрудкам.
Асвячэнне капліцы XVIII стагоддзя на Навагрудчыне
16 верасня ў вёсцы Несутычы Навагрудскага раёна была ўрачыста адчынена і асвячана капліца Святога Крыжа.
Прыдарожная капліца пабудавана ў XVIII стагоддзі ў стылі барока.
100-гадовы юбілей парафіi у Першамайску
24 верасня ў аграгарадку Першамайск (Шчучынскі дэканат) 100-годдзе адзначыла парафія Узвышэння Святога Крыжа.
У савецкія часы касцёл быў зачынены, на пачатку 90-х гадоў мінулага стагоддзя распачалося адраджэнне парафіяльнага жыцця і аднаўленне святыні.
Сімпозіум аб ролі свецкіх людзей у Касцёле
30 верасня ў Гродне адбыўся сімпозіум, прысвечаны пастырскаму году свецкіх, які па рашэнні епіскапату праходзіць сёлета ў Касцёле на Беларусі, і Сіноду біскупаў на тэму сінадальнасці.
Сімпозіум, ініцыятарам якога быў арцыбіскуп эмерыт Тадэвуш Кандрусевіч, прайшоў у будынку Вышэйшай духоўнай семінарыі.
Юбілей у санктуарыі ў Барунах
14 кастрычніка ў дыяцэзіяльным санктуарыі ў Барунах (Ашмянскі дэканат) адбылася ўрачыстасць Маці Божай Барунскай, якая ўшаноўваецца пад тытулам Суцяшальніцы Засмучаных.
Урачыстасць была юбілейнай, паколькі адзначалася 330-годдзе з часу прызнання абраза Маці Божай Барунскай цудадзейным. У кастрычніку 2024 г. адбудзецца ўкаранаванне абраза.
Асвячэнне капліцы ў Дворышчы
21 кастрычніка на могілках у Дворышчы адбылося ўрачыстае асвячэнне капліцы Маці Божай Ружанцовай, якая належыць парафіі Адведзінаў Найсвяцейшай Панны Марыі ў Тракелях (Радунскі дэканат).
Капліца была пабудавана ў 1990-я гады мясцовым калгасам. Узведзены былі толькі сцены, унутраныя работы не вяліся. У такім стане капліца заставалася да 2019 г., калі была перададзена Лідскім райвыканкамам парафіі ў Тракелях.
Юбілей піярскай парафіі ў Лідзе
25 лістапада ў Лідзе адбыліся ўрачыстасці з нагоды 25-гадовага юбілею парафіі Унебаўзяцця Найсвяцейшай Панны Марыі.
У касцёле св. Юзафа Каласанса, заснавальніка супольнасці айцоў піяраў, якія служаць у гэтай парафіі, сабраліся шматлікія мясцовыя вернікі і госці.
Прэс-служба Гродзенскай дыяцэзіі