На апошнім тыдні перад урачыстасцю Божага Нараджэння маладыя вернікі гродзенскай парафіі Святога Духа, якія рыхтуюцца да сакрамэнту канфірмацыі, сабраліся на аплаткавай сустрэчы.
Дзяленне аплаткай – неад’емная частка традыцыі святкавання Нараджэння Езуса Хрыста. Абрад дзялення аплаткай злучаны са складаннем узаемных віншаванняў і з’яўляецца выразам дабрыні і адкрытасці.
Сутнасць гэтага абраду засноўваецца на крыніцы і цэнтры хрысціянскага жыцця – Эўхарыстыі, якая яшчэ называецца “ламаннем хлеба”. Над гэтым сімвалізмам і параўнаннем удзельнікі сустрэчы разважалі на яе пачатку. Таксама маладыя людзі ўзгадалі, што прыняцце святой Камуніі чыніць з тых, хто да яе прыступае, супольнасць веры, і гэтую супольнасць людзі выносяць па-за сцены касцёла ў штодзённае жыццё, будуючы Містычнае Цела Хрыста ў сем’ях і іншых асяроддзях.
Акрамя таго, удзельнікі сустрэчы паразважалі над урыўкам Евангелля, які апісвае момант Нараджэння Хрыста, памаліліся за сваіх родных, блізкіх, сяброў, усіх, хто знаходзіцца ў патрэбе, і ўсіх, хто не дачакаўся радасных святаў, адышоўшы ў вечнасць. Сімвалам еднасці прысутных сталі малітва “Ойча наш” і дзяленне аплаткай, спалучанае са складаннем віншаванняў.
Прэс-служба Гродзенскай дыяцэзіі