У нядзелю 22 кастрычніка ў Цэнтры культуры і народнай творчасці аграгарадка Дворышча адбылася прэзентацыя кнігі “Мінулае і сучаснае Дворышча”. Гэта стала яшчэ адной знакавай падзеяй у жыцці парафіі Адведзінаў Найсвяцейшай Панны Марыі ў Тракелях (Радунскі дэканат), капліца якой у тым жа аграгарадку была асвячана напярэдадні.
У кнізе аўтар адпраўляе чытача ў падарожжа ў часе, знаёміць з мінулым і сучасным Дворышча і яго ваколіцамі. Кніга ўражвае зместам, мае багаты выяўленчы матэрыял.
Новыя адкрыцці чакаюць тых, хто захоплена ўглядаецца ў сівую мінуўшчыну Дворышча, пра якое сказана:
Пяцьсот гадоў мястэчку мінавала:
Гісторыі муроў, падзей і развіцця.
Вякамі Дворышча сваю прысутнасць шанавала,
Людскім імкненням ды да лепшага жыцця...
На прэзентацыі, якую правялі Іван Ганевіч і Юлія Сямашка, сабраліся мясцовыя вернікі, валанцёры і запрошаныя госці. Галоўным героем мерапрыемства стаў аўтар выдання кс. канонік Юрый Бяганскі, пробашч тракельскай парафіі.
Асноўнай тэмай прэзентацыі стала захаванне ўнікальнай культуры Радзімы і памяці пра яе выдатных прадстаўнікоў. Выступаючымі былі жыхары Дворышча і навакольных вёсак. Вельмі цікавым было выступленне настаўніцы беларускай мовы і літаратуры мясцовай школы Ірыны Шостак, якая падзялілася ўражаннямі ад новай кнігі і распавяла аб супрацоўніцтве з аўтарам.
На сцэне гучалі вершы і песні ў выкананні таленавітых людзей дварышчанскай зямлі. Яркія і незабыўныя эмоцыі падаравалі мясцовым жыхарам і гасцям Алег Кароль, Міхаіл Рубаў, Тэрэса Банцавіч, Марыя Смолка, вучні музычнай і сярэдняй школ.
Выступаючыя пажадалі кс. каноніку Юрыю Бяганскаму далейшых поспехаў у святарскай і літаратурнай дзейнасці.
Пробашч тракельскай парафіі падзякаваў усім вернікам і спонсарам, якія малітвай і ахвяраваннямі падтрымалі будаўніцтва капліцы Маці Божай Ружанцовай, што знаходзіцца на мясцовых могілках. Самыя актыўныя атрымалі на памяць экзэмпляры новай кнігі і ганаровыя граматы.
Прэс-служба Гродзенскай дыяцэзіі
