15 кастрычнiка ў парафii св. Тэрэзы Авiльскай у Шчучыне адзначалася адпустовая ўрачыстасць у гонар апякункі гэтай супольнасці. Перад гэтым 13 кастрычніка ў парафіі адбыўся Фацімскі дзень і пачалося саракагадзіннае набажэнства.
Саракагадзіннае набажэнства – малітву вернікаў перад Найсвяцейшым Сакрамэнтам на працягу 40 гадзін, якая папярэднічае адпустовай урачыстасці, – узначаліў пробашч мінскай парафіі Найсвяцейшай Тройцы (св. Роха) кс. канонік Юрый Санько.
У першы дзень набажэнства святар расказваў пра тое, што важна жыць у супольнасці з людзьмі, а яшчэ важней – у супольнасці з Богам. Ксёндз Юрый падзякаваў парафіянам за тое, што яны рэгулярна прыступаюць да споведзі, назваўшы гэта “знакам супрацоўніцтва з Богам”.
У другi дзень святар засяродзіў увагу на тэме граху. Ён адзначыў, што грэх – знішчэнне чалавечай годнасцi, што д’ябал хоча рознымі спосабамі спакусіць чалавека і прымусіць да граху, таму неабходна быць вельмі ўважлівымі і своечасова распазнаць спакусы, каб не здзяйсняць грахоў.
У дзень адпустовай урачыстасці на галоўнай Эўхарыстыі ксёндз Юрый разважаў на тэму святой Iмшы. Ён адзначыў, што некаторыя няўважліва слухаюць святара, а між тым у таямніцы Імшы няма ніводнага лішняга слова. Таму, як падкрэсліў ксёндз Санько, вельмі важна прысутнічаць на Iмшы не толькі фізічна, але і сваімі думкамі.
Літургія завяршылася працэсiяй вакол касцёла.
Алег Мяткоўскi, прэс-служба Гродзенскай дыяцэзіі
Фота: Кацярына Кулiк
