25 мая ў смаргонскай парафіі св. Міхала Арханёла, дзе служаць салезіяне, адбылося свята сям’і. Яго правядзенне там стала традыцыяй.

Нам паведамілі, што па задуме арганізатараў гэтае свята з’яўляецца “днём падзякі Богу за нашы сем’і” і магчымасцю для ўсёй сям’і “пабыць разам і добра правесці час”.

Распачалося свята Імшой, на якой новыя члены “Савіо-клуба” – салезіянскай суполкі для падлеткаў – прынеслі абяцанні. Потым на касцёльным падворку адбыўся сямейны фэст. Увазе прысутных былі прапанаваны супольныя гульні, інтэграцыйныя танцы, конкурсы, крама, у якой за добрыя ўчынкі можна было набыць тавары, кавярня для бацькоў, разнастайныя забавы, выступленне фокусніка.

Завяршылася свята тэатралізаваным “салезіянскім слоўкам”, у якім быў прадстаўлены сон святога Яна Боско пра дзве калоны.

Прэс-служба Гродзенскай дыяцэзіі

28 мая ў араторыі св. Яна Боско, які дзейнічае пры парафіі св. Міхала Арханёла ў Смаргоні, адбылося свята сям’і для дзяцей і іх бацькоў.

Святочная праграма пачалася Эўхарыстыяй.

У казанні кс. Міхаіл Радзевіч SDB засяродзіў увагу на ўрачыстасці Спаслання Духа Святога, якая адзначалася ў гэты дзень, і Яго дзеянні ў жыцці кожнага чалавека. Святар адзначыў, што Дух дае суцяшэнне і адвагу, каб пераносіць складаныя моманты, і дапамагае радасна ўспрымаць штодзённае жыццё. Па яго словах, дзеянне Духа можна заўважыць у сям’і, калі яе члены імкнуцца жыць у згодзе і ўзаемнай павазе; натуральна, што ў сем’ях узнікаюць непаразуменні, але Дух Святы вядзе да еднасці, прабачэння і любові.

Таксама святар нагадаў пра Святую Сям’ю і заахвоціў вернікаў імкнуцца будаваць свае сем’і на яе ўзор.

Пасля Імшы дзеці і бацькі накіраваліся на вуліцу, дзе іх чакала вясёлая забаўляльная праграма, падрыхтаваная ксяндзамі салезіянамі, сёстрамі салезіянкамі, салезiянамi-супрацоўнікамі, аніматарамі, кандыдатамі ў анiматары i памочнікамі анiматараў.

Прысутныя мелі магчымасць паўдзельнічаць у розных стэндавых гульнях і зарабіць балы, якія пасля можна было абмяняць, каб пачаставацца хот-догамі. Адным са стэндаў быў экалагічны, які даваў магчымасць паспрабаваць сартаваць смецце, каб садзейнічаць захаванню прыроды. Таксама дзецям і бацькам былі прапанаваны латарэя, кафэ, розныя сюрпрызы і забавы, што ім вельмі падабалася, стварала святочны настрой і атмасферу радасці.

Перад заканчэннем свята быў падведзены вынік латарэі, у якой тры пераможцы атрымалі падарункі для ўсёй сям’і.

Завяршылася свята салезіянскім слоўкам кс. Артура Ляшнеўскага SDB, благаслаўленнем кс. Казіміра Муравы SDB і супольным фотаздымкам.

Кс. Міхаіл Радзевіч SDB

У першую нядзелю мая ў Гродзенскай дыяцэзіі па традыцыі святкаваўся Дзень маці. З гэтай нагоды ў парафіі св. Яна Паўла ІІ у Смаргоні адбыліся адмысловыя малітвы ў інтэнцыі ўсіх маці.

Пробашч парафіі кс. Яўген Учкуроніс і дзеці павіншавалі мам з гэтым святам. Мам, якія адышлі ў вечнасць, успомнілі ў малітве.

Таксама ў гэты дзень члены малітоўнай суполкі “Маці ў малітве” і вернікі смаргонскай парафіі здзейснілі пілігрымку ў санктуарый Гродзенскай дыяцэзіі Маці Божай Суцяшальніцы Засмучаных у Барунах (Ашмянскі дэканат). Там яны ўдзельнічалі ў святкаванні дыяцэзіяльнага Дня маці.

Прэс-служба Гродзенскай дыяцэзіі

30 студзеня Біскупскі вікарый для горада Магілёва і Магілёўскай вобласці біскуп Аляксандр Яшэўскі SDB наведаў Смаргонь — свой родны горад, — дзе ў парафіі святога Арханёла Міхала, у якой нясуць служэнне салезіяне, узначаліў цэлебрацыю святой Імшы ва ўрачыстасць святога Яна Боско, заснавальніка салезіянскага таварыства.

У прамоўленай на Эўхарыстыі гаміліі біскуп Яшэўскі запрасіў прысутных спыніцца перад выявай святога, засяродзіць свой позірк і спытаць, што ён хоча нам сказаць.

«Давайце памятаць, што мэта нашага жыцця — ісці за Езусам Хрыстом, як гэта рабілі святыя. Святы Ян Боско са сваёй святасцю, сваёй духоўнасцю павінен дапамагчы нам наследаваць Езуса, як ён наследаваў Яго», — адзначыў іерарх.

Паводле біскупа, успамінаючы святога Яна Боско, варта звярнуць увагу на яго здольнасць аб’ядноўваць вакол сябе людзей на супольную працу і дапамогу дзецям. Пры гэтым нельга забывацца пра яго вялікую еднасць з Богам.

«Ксёндз Боско жыў так, быццам бачыў Бога. Для святога Яна Боско Езус Хрыстус быў жывой і заўсёды прысутнай Асобай у кожны момант яго жыцця і ва ўсіх яго справах. Езус не быў для яго кімсьці далёкім», — заўважыў іерарх.

Узгадаў біскуп Яшэўскі і араторый, створаны Янам Боско, — месца, якое надавала сэнс і энтузіязм жыццю многіх маладых людзей.

«У той час у Турыне было шмат маладых людзей, якія адчувалі вялікія цяжкасці. І святы сказаў сабе: „Я не магу спакойна глядзець, склаўшы рукі; не магу рабіць выгляд, што нічога не адбываецца“. Яго араторый нарадзіўся з сэрца, поўнага любові; з сэрца, здольнага ўзварухнуцца і заплакаць з прычыны моладзі, якую Пан даверыў яму», — дадаў біскуп.

Прысутным вернікам ён прапанаваў паразважаць над тым, што сказаў бы ксёндз Боско сёння.

«Я думаю, што першае, што ён сказаў бы нам, было б наступнае: „Беражыце сваю душу. Гэта самае дарагое, што ў вас ёсць. Не страцьце яе, не грэбуйце ёй. Беражыце яе, клапаціцеся пра яе. Зрабіце так, каб яна была месцам, дзе можа прабываць Пан Бог. Вы можаце мець самыя вялікія скарбы ў свеце, але што з таго, калі вы страціце душу?..“» — падзяліўся думкамі іерарх.

Напрыканцы гаміліі ён заклікаў маладых людзей быць святымі: «Айцец Боско кажа нам, што святасць заключаецца ў тым, каб заўсёды быць радаснымі. Таму, дарагія юнакі і дзяўчаты, будзьце радаснымі, напоўніцеся сапраўднай радасцю, якая паходзіць ад Езуса Хрыста; радасцю, што азначае любіць і жадаць дабра ўсім», — заахвоціў моладзь духоўны сын святога Яна Боско біскуп Аляксандр Яшэўскі.

Паводле Catholic.by

30 мая ў смаргонскай парафіі св. Яна Паўла ІІ адбылася ўрачыстасць Першай святой Камуніі.

У нядзелю Найсвяцейшай Тройцы 68 дзяўчынак і хлопчыкаў упершыню прынялі Цела Хрыста. Камунію ўдзяліў пробашч парафіі ксёндз Яўген Учкуроніс.

Дзеці былі адпаведным чынам падрыхтаваны да гэтага важнага дня на ўроках рэлігіі, якія праводзіла с. Магдаліна Кулай з Гудагая, кармэліткa Дзіцяткі Езуса.

Прэс-служба Гродзенскай дыяцэзіі

Фота: з архіву парафіі

Генеральны вікарый Гродзенскай дыяцэзіі біскуп Юзаф Станеўскі наведаў парафію св. Яна Паўла ІІ у Смаргоні, дзе ўдзяліў вернікам сакрамэнт канфірмацыі.

Прымаючы сем дароў Духа Святога, парафіяне абавязаліся ўзрастаць у веры і вызнаваць яе ў сваім штодзённым жыцці.

У гаміліі іерарх казаў пра жывую веру з Духа Святога. Біскуп заахвоціў да таго, каб быць адважнымі сведкамі Езуса Хрыста на месцах сваёй вучобы і працы, а таксама сведчыць пра Яго словам і ўчынкам.

На заканчэнне Эўхарыстыі тыя, хто прыняў сакрамэнт хрысціянскай сталасці, выказалі ўдзячнасць у адрас усіх, хто рыхтаваў іх да гэтай падзеі. Між іншым вернікі падзякавалі сваім душпастырам на чале з пробашчам парафіі кс. Яўгенам Учкуронісам.

Прэс-служба Гродзенскай дыяцэзіі

18 красавіка біскуп Гродзенскі Аляксандр Кашкевіч наведаў парафіяльную супольнасць святога Міхала Арханёла ў Смаргоні.

Падчас Імшы, якая цэлебравалася на палявым алтары, іерарх удзяліў 71 верніку сакрамэнт хрысціянскай сталасці.

У гаміліі біскуп падкрэсліў значэнне сакрамэнту канфірмацыі ў жыцці кожнага чалавека. Па яго словах, гэты сакрамэнт патрэбны чалавеку, каб быць сведкам Уваскрослага Пана ў сённяшнія цяжкія часы, калі неабходныя сапраўдныя вызнаўцы Хрыста.

Пастыр Касцёла на Гродзеншчыне заахвоціў асабліва маладых людзей, якія ў гэты дзень былі ўзбагачаны сямю дарамі Святога Духа, не змарнаваць ласкі, якую дае Бог у гэтым сакрамэнце, а старацца пастаянна ўзрастаць у дасканаласці і імкнуцца да паглыблення сваёй веры.

На заканчэнне ўрачыстасці парафіяне, якія прынялі сакрамэнт, выказалі словы ўдзячнасці іерарху, сваім бацькам, сведкам канфірмацыі, а таксама святарам і сёстрам законным, якія адпаведным чынам рыхтавалі іх да гэтай падзеі.

Пробашч парафіі кс. Павел Шчарбіцкі SDB таксама падзякаваў біскупу за прыбыццё, прамоўленае Божае слова і ўдзяленне сакрамэнту. Тым жа, хто прыступіў у гэты дзень да канфірмацыі, ён пажадаў, каб прыняты сакрамэнт стаў для іх матывам да ўзрастання і духоўнага выспявання ў веры.

Kс. Юрый Марціновіч

Кожны месяц салезіяне-супрацоўнікі Смаргоні збіраюцца на фармацыйную сустрэчу, каб пабыць разам, пагутарыць, падзяліцца апошнімі навінамі і набрацца духоўных сіл на наступны месяц.

Тэмай сустрэчы, якая прайшла ў лютым, было хрысціянскае пакліканне. На пачатку сустрэчы адказныя за фармацыю прадставілі Звеставанне Марыі як вобраз паклікання кожнага чалавека. Потым у малых групах разважалі пра пакліканне з розных бакоў: шлях святасці, апостальства, асаблівасці і харызмы. У групах была магчымасць падзяліцца перажываннямі, меркаваннямі, уласным вопытам.

Падсумоўваючы сустрэчу, пробашч парафіі св. Міхала Арханёла ў Смаргоні кс. Павел Шчарбіцкі SDB адзначыў, што ўсе з прысутных праз знакі ад Бога знайшлі сваё пакліканне, ідуць шляхам святасці, а таксама маюць асабістае салезіянскае пакліканне. Гэтае пакліканне, па словах святара, перш за ўсё падтрымлівае любоў, і калі ў кагосьці яна згасае, то ёсць супольнасць, якая павінна мець адкрытыя вочы, каб своечасова ўбачыць такога чалавека і дапамагчы яму запаліць агонь любові зноў.

30 студзеня, напярэдадні ўрачыстасці св. Яна Боско, вернікі Смаргоні ўдзельнічалі ў адмысловым набажэнстве “Транзітус”, якое ўзначаліў дапаможны біскуп Гродзенскай дыяцэзіі Юзаф Станеўскі. Гэта малітоўнае чуванне напярэдадні ўспаміну святога, якое мае карані ў францішканскай традыцыі.

“Транзітус” даслоўна азначае пераход, і ў дадзеным выпадку маецца на ўвазе пераход душы ксяндза Боско ў радасць Нябеснага Валадарства. Пераход, які неад’емна звязаны з смерцю, з’яўляецца ў пэўным сэнсе сумным, бо асоба перастае жыць у зямных рэаліях, але для хрысціянаў гэта адначасова вельмі радасны дзень, бо калі гэты чалавек святы і чысты ў вачах Бога, ён у той момант нараджаецца для неба.

“Транзітус” св. Яна Боско – момант яго сустрэчы з Богам тварам у твар. Праз разважанне над гэтым момантам удзельнікі набажэнства хочуць так, як ён, добра падрыхтавацца да свайго пераходу і мець у сэрцах за мэту толькі Божы Дом.

Набажэнства складаецца з трох частак: нешпары на ўрачыстасць святога, выстаўленне Найсвяцейшага Сакрамэнту і апошні дзень навэнны да св. Яна Боско, чытанне жыццяпісу апошніх дзён святога. Падзеі, даты і людзі, якія ўзгадваліся падчас набажэнства, дапамагалі вернікам глыбей перажыць апошнія дні святога і ўвайсці ў клімат “транзітусу” айца і настаўніка моладзі.

Марта Адахоўская

22 кастрычніка ў парафіі святога Яна Паўла ІІ у Смаргоні з удзелам біскупа Юрыя Касабуцкага адзначылі адпустовую ўрачыстасць.

18 кастрычніка павялічылася колькасць міністрантаў у парафіi св. Яна Паўла ІІ у Смаргоні.

10 кастрычнiка прадстаўнікі літургічнай службы алтара парафіі св. Яна Паўла ІІ у Смаргоні наведалі Вышэйшую духоўную семінарыю ў Гродне.

У верасні ўдзельнікі руху “Маці ў малітве” парафіі св. Яна Паўла ІІ у Смаргоні здзейснілі духоўнае падарожжа на мядзельскую Кальварыю, а таксама наведалі касцёлы ў Мядзелі, Нарачы і Вілейцы. Разам з імі ў пілігрымцы быў пробашч парафіі кс. Яўген Учкуроніс.

20 жніўня адбыўся аднадзённы сплаў-экскурсія па рацэ Вілія на байдарках для малодшай і старэйшай моладзі парафіі св. Яна Паўла ІІ у Смаргоні.

Курыя Гродзенскай дыяцэзіі са смуткам паведамляе, што 6 жніўня ва ўзросце 52 гадоў адышла ў вечнасць Інна Ляшнеўская, маці кс. Артура Ляшнеўскага SDB, вікарыя парафіі св. Міхала Арханёла і адказнага за салезіянскі моладзевы Цэнтр у Смаргоні.

19 ліпеня падчас нядзельнай Эўхарыстыі адбылося прывітанне новага пробашча вернікамі капліцы Маці Божай Вастрабрамскай у Залессі (Смаргонскі дэканат).

12 ліпеня падчас святой Імшы на пасаду пробашча парафii св. Мiхала Арханёла ў Смаргоні ўступіў кс. Павел Шчарбiцкi SDB.

14 чэрвеня ў парафіі св. Міхала Арханёла ў Смаргоні адбылася прыміцыйная Імша а. Аляксея Марыі Юхневіча OFMConv.

У парафіі св. Яна Паўла ІІ у Смаргоні адбылося заканчэнне навучальнага і катэхетычнага года 2019/2020.

У парафіі святога Яна Паўла ІІ у Смаргоні адбыўся сямейны конкурс на лепшую творчую працу, звязаную з жыццём і дзейнасцю Вялікага Папы, з нагоды 100-гадовага юбілею яго нараджэння.

24 мая салезіяне Смаргоні адзначыла ўрачыстасць Марыі Успамогі Хрысціянаў. Менавіта Марыю Успамогу хрысціянаў выбраў святы ксёндз Боско галоўнай апякункай усіх галін Салезіянскай сям’і: ксяндзоў салезіянаў, сясцёр законных – дачок Марыі Успамогі, салезіянаў-супрацоўнікаў, членаў асацыяцыі ADMA.

18 мая прыпала 100-я гадавіна з дня нараджэння святога Яна Паўла ІІ, Вялікага Папы, які вельмі пасадзейнічаў адраджэнню касцёльных структур у нашай краіне.

Час пандэміі, выкліканай пашырэннем каранавірусу, нараджае ў многіх людзях пачуццё адказнасці і гатоўнасць несці дапамогу медыцынскім установам. Шмат парафій нашай дыяцэзіі ўжо ўключылася ў дапамогу мясцовым шпіталям і медперсаналу.

14 мая з нагоды сусветнага дня посту і малітвы аб спыненні пандэміі каранавірусу ў парафіі св. Міхала Арханёла ў Смаргоні адбылася адарацыя Найсвяцейшага Сакрамэнту, якая доўжылася ўвесь дзень.

10 мая вернікі парафіі св. Міхала Арханёла ў Смаргоні на святой Імшы дзякавалі за шматгадовае служэнне ў парафіі свайму пробашчу кс. Алегу Жураўскаму. Далей святар будзе служыць у адной з парафій Гродзенскай дыяцэзіі.