17 верасня біскуп Гродзенскі Уладзімір Гуляй прызначыў студэнтаў Міждыяцэзіяльнай вышэйшай духоўнай семінарыі ў Гродне акалітам і кандыдатам да прыняцця сакрамэнту святарства.

Акалітам стаў студэнт пятага курса Ян Каськевіч, кандыдатам да пасвячэння – студэнт шостага курса Дзмітрый Роўны.

Адпаведны абрад быў здзейснены на Імшы, якую біскуп цэлебраваў у капліцы семінарыі.

У гаміліі іерарх падкрэсліў, што Касцёл — гэта “найперш супольнасць жывога Бога, дзе прысутнічае Хрыстус і дзе мы вучымся, як жыць у веры”. “Хрыстус з’явіўся людзям у целе — гэта таямніца ўцелаўлення, Бог стаў чалавекам. Ён апраўданы Духам — усё Яго жыццё было знакам моцы Духа Святога. Нябёсы сведчылі пра Яго.

Ён абвяшчаўся язычнікам — Евангелле неслі да ўсіх. Ён знайшоў у свеце веру — людзі прынялі Яго як Збаўцу. Ён быў узнесены ў славе, атрымаў канчатковую перамогу, – адзначыў біскуп. – І той, хто становіцца акалітам або кандыдатам да святарства, павінен зрабіць гэтую праўду цэнтрам свайго жыцця”. Па словах іерарха, усё служэнне святароў “павінна весці да гэтага ядра веры: абвяшчаць Хрыста, які прыйшоў, памёр і ўваскрос для нас”.

Звяртаючыся да дваіх семінарыстаў, адзін з якіх стаў акалітам, а другі кандыдатам да пасвячэння, біскуп сказаў: “Для вас гэта вельмі актуальна. Бо вы таксама можаце сустрэць людзей, якія будуць крытыкаваць, не разумець, адкідаць. Але сапраўдная каштоўнасць вашага паклікання пацвердзіцца плёнам вашай вернасці, вашай малітвы, вашага служэння”. “Ваша будучае святарскае служэнне павінна паказваць людзям не вас, а Хрыста: Яго прысутнасць у Эўхарыстыі, Яго слова ў Евангеллі, Яго любоў у вашых учынках”, – звярнуў увагу іерарх.

Ён адзначыў, што ў фрагменце Евангелля, які чытаўся на літургіі, “Езус паказвае на дзяцей, якія заўсёды незадаволеныя: калі ім іграюць — яны не хочуць танцаваць; калі плачуць — яны не хочуць спачуваць”. “Гэта вобраз людзей, якія не ўмеюць адказваць, – патлумачыў біскуп. – Яны жывуць толькі сваім настроем, сваімі капрызамі. Такія людзі ніколі не будуць добрымі вучнямі, бо вучань — гэта той, хто слухае і адказвае. Уявім, што ў класе сядзяць два вучні. Адзін заўсёды толькі каментуе, заўсёды ўсё крытыкуе: “Навошта гэта трэба? Чаму так складана? Чаму трэба вучыць? Не бачу тут ніякага сэнсу”. Ён падобны да тых дзяцей з прыпавесці — ні радасці не прымае, ні жалобы не разумее. Другі вучань слухае, стараецца, можа, не ўсё разумее адразу, але прымае і верыць, што настаўнік вядзе яго да ведаў

(…) Дарагія семінарысты! Кожны з вас павінен абраць, кім хоча быць: “капрызным дзіцем” з Евангелля, якое заўсёды незадаволена, ці сапраўдным вучнем, які слухае, прымае і расце”.

“Сёння вы, дарагія браты, паказваеце, што хочаце быць тымі, хто захоўвае і перадае скарб веры. А гэта значыць — стаць вучнямі, а потым і пастырамі, якія вядомыя не крытыкай і капрызамі, а вернасцю, пакорай і плёнам жыцця, – сказаў біскуп семінарыстам. – Служыце з пакораю, маліцеся з даверам, любіце Хрыста, які абраў вас. І памятайце, што перадусім вы заўсёды будзеце слугамі. Святар — гэта той, хто служыць, а не пануе. Хто любіць, а не шукае выгоды. Хто вядзе да Хрыста, а не да сябе”.

Прэс-служба Гродзенскай дыяцэзіі

12 жніўня ў Міждыяцэзіяльнай вышэйшай духоўнай семінарыі ў Гродне прайшоў уступны экзамен.

Напярэдадні ў семінарыі адбыліся падача дакументаў і кваліфікацыйныя размовы, потым абітурыенты ўдзельнічалі ў святой Імшы, мелі магчымасць пазнаёміцца і паразмаўляць.

Непасрэдна папярэднічалі экзамену Ютрань і святая Імша ў капліцы семінарыі, якую цэлебраваў яе рэктар кс. канонік Віталь Вайцяхоўскі. Перад экзаменам да абітурыентаў звярнуўся біскуп Гродзенскі Уладзімір Гуляй, заахвоціўшы іх даверыць усё Богу, прасіць у Яго дапамогі і супрацоўнічаць з Ім у справе свайго паклікання.

Экзамен складаўся з дзвюх частак – тэсту і сачынення-эсэ. У першай частцы трэба было паказаць свае веды ў Катэхізісе Каталіцкага Касцёла, жыцці паўсюднага Касцёла і Касцёла на Беларусі, у другой – паразважаць на духоўныя тэмы адносна паклікання, ролі Бібліі ў жыцці хрысціяніна і таго, як дасягнуць святасці, беручы прыклад са святых.

Экзамен прымала камісія ў наступным складзе:

біскуп Уладзімір Гуляй, ардынарый Гродзенскай дыяцэзіі – старшыня камісіі;

ксёндз канонік Віталь Вайцяхоўскі, рэктар семінарыі;

ксёндз Ян Раманоўскі, прэфект семінарыі;

ксёндз Павел Скуба, куратар прапедэўтычнага перыяду ў семінарыі.

Пасля нарады экзаменацыйная камісія паведаміла, што новымі студэнтамі сталі:

Аляксандр Блашкевіч (Гродзенская дыяцэзія, парафія св. Юрыя ў Варнянах);

Яўгеній Бялы (Гродзенская дыяцэзія, парафія Маці Божай Нястомнай Дапамогі ў Парэччы);

Эміль Вялічка (Мінска-Магілёўская архідыяцэзія, парафія Беззаганнага Зачацця Найсвяцейшай Панны Марыі ў Бабруйску);

Ягор Ленец (Гродзенская дыяцэзія, парафія св. Піо ў Гродне);

Раман Манулік (Гродзенская дыяцэзія, парафія святых апосталаў Пятра і Паўла ў Іўі);

Аляксандр Плавін (Пінская дыяцэзія, парафія Нараджэння Найсвяцейшай Панны Марыі ў Гомелі);

Андрэй Рабкоўскі (Віцебская дыяцэзія, парафія Найсвяцейшай Тройцы ў Глыбокім);

Віктар Салдаценка (Гродзенская дыяцэзія, парафія св. Францішка Ксаверыя ў Гродне);

Антон Фядкевіч (Гродзенская дыяцэзія, парафія св. Францішка Ксаверыя ў Гродне);

Пётр Шацілаў (Гродзенская дыяцэзія, парафія Божай Міласэрнасці ў Гродне);

Уладзіслаў Штылеўскі (Пінская дыяцэзія, парафія Нараджэння Найсвяцейшай Панны Марыі ў Гомелі).

Пасля абвяшчэння вынікаў экзамену новыя студэнты разам з біскупам Гродзенскім у капліцы семінарыі падзякавалі Богу ў малітве. Біскуп удзяліў ім благаслаўленне на вяртанне з семінарыі, быў зроблены супольны фотаздымак.

Такім чынам, у навучальным годзе, які пачнецца 2 верасня, падрыхтоўку да святарства ў семінарыі распачнуць адзінаццаць новых студэнтаў. Кіраўніцтва семінарыі просіць людзей добрай волі маліцца ў іх інтэнцыі, а таксама аб новых і святых пакліканнях да святарства.

Прэс-служба Гродзенскай дыяцэзіі

Біскуп Гродзенскі Аляксандр Кашкевіч у спецыяльным пасланні, адрасаваным духавенству, якое служыць на тэрыторыі Гродзенскай дыяцэзіі, выказаў просьбу звярнуцца да парафіяльных малітоўных груп і ўсіх вернікаў са словам заахвочвання ў інтэнцыі новых пакліканняў і за святароў.

“Заахвочваю да малітвы ў інтэнцыі святых пакліканняў да святарства, а таксама аб трываласці ў пакліканні і руплівасці ў імкненні да асабістай святасці для святароў Гродзенскай дыяцэзіі”, – піша біскуп.

Усім, хто бярэцца за гэтую важную малітоўную справу, пастыр Касцёла на Гродзеншчыне сардэчна дзякуе і ўдзяляе ім благаслаўленне.

Прэс-служба Гродзенскай дыяцэзіі

4 мая ў Вышэйшай духоўнай семінарыі ў Гродне адбылася малітвa перад Найсвяцейшым Сакрамэнтам у інтэнцыі новых святарскіх пакліканняў.

На адарацыю, якая прайшла ў межах Тыдня малітваў аб пакліканнях да служэння ў Касцёле, семінарысты запрасілі ўсіх ахвотных – моладзь, свецкіх і кансэкраваных асобаў.

Таксама на адарацыі семінарысты дзякавалі Пану Богу за тых, хто іх падтрымлівае духоўным і матэрыяльным чынам.

Прэс-служба Гродзенскай дыяцэзіі

Каб стаць святарамі, семінарыстам трэба прайсці пэўныя этапы фармацыі, якія дапамагаюць ім лепш усвядоміць сэнс будучага святарскага служэння. У сувязі з гэтым 12 сакавіка, у ІII нядзелю Вялікага посту, студэнтам 3 курса Вышэйшай духоўнай семінарыі ў Гродне была ўдзелена паслуга лектарату, a студэнтам 4 курса – паслуга акалітату.

Таксама ў гэты дзень двое семінарыстаў упершыню апранулі духоўнае адзенне – сутаны.

У капліцы семінарыі на святой Імшы прысутнічалі мадэратары навучальнай установы на чале з рэктарам кс. канонікам Віталіем Вайцяхоўскім, студэнты, іх блізкія.

Эўхарыстыю ўзначаліў біскуп Гродзенскі Аляксандр Кашкевіч, які ўстанавіў на ёй новых лектараў і акалітаў і асвяціў сутаны. Гамілію прамовіў духоўны айцец семінарыі кс. Ян Сарэла.

Пастыр Касцёла на Гродзеншчыне заахвоціў семінарыстаў працягваць узрастаць у пакліканні, умацоўваючы сваю веру і яшчэ больш набліжаючыся да Хрыста.

Семінарысты, якія прынялі паслугі лектарату і акалітату, зрабілі такім чынам яшчэ адзін вельмі значны крок на шляху да святой мэты: быць тымі, хто працягвае адкупленчую місію Хрыста і з’яўляецца мостам паміж Богам і людзьмі, нягледзячы на сваю чалавечую абмежаванасць.

Лектары абвяшчаюць жыццядайную моц Святога Пісання з амбоны падчас Эўхарыстыі, а таксама, чэрпаючы з Божага слова веру і адвагу, увасабляюць яго ў жыццё ў выкананні штодзённых абавязкаў.

Акалітаў, у сваю чаргу, Касцёл палічыў годнымі дакранацца да найбольшай Таямніцы хрысціянскай веры, каб яны маглі яшчэ больш прыпадобніцца да свайго Настаўніка Езуса Хрыста.

Прэс-служба Гродзенскай дыяцэзіі

Фота: Аляксей Ціхан

У Вышэйшай духоўнай семінарыі ў Гродне праходзіць сесія. Студэнты здаюць экзамены, якія з’яўляюцца падсумаваннем першага семестра вучобы.

Нягледзячы на атмасферу засяроджанасці, якая падчас сесіі пануе ў сценах семінарыі, там адбылася так званая каляда. Душпастыр семінарыі кс. Ян Сарэла благаславіў пакоі студэнтаў і іншыя памяшканні.

Спачатку ў капліцы гэтай навучальнай установы семінарыйная супольнасць сабралася на малітве, даручыўшы Пану Богу новы год і просячы Яго шчодрых ласкаў на гэты час. Таксама прысутныя разам памаліліся ў інтэнцыі семінарыі і ўсіх, хто ўтварае яе супольнасць.

Пасля святар благаславіў і акрапіў асвячонай вадой капліцу, пакоі выхаваўцаў і студэнтаў, кухню і сталовую, месцы вучобы.

Прэс-служба Гродзенскай дыяцэзіі

Фота: Аляксей Ціхан

У межах Тыдня малітваў аб адзінстве хрысціянаў студэнты Вышэйшай духоўнай семінарыі ў Гродне сабраліся на малітве ў капліцы гэтай навучальнай установы.

Удзельнікі набажэнства памаліліся ў інтэнцыі адзінства хрысціянаў. Для семінарыстаў, якія праходзяць фармацыю і рыхтуюцца да прыняцця пасвячэння, гэтая малітва была асаблівай магчымасцю звярнуцца да Бога з просьбай, каб усе хрысціяне як вучні Езуса былі адным, каб паміж імі не было нязгоды і падзелаў.

Таксама яны маліліся аб тым, каб усе хрысціяне былі сведкамі вернасці Езусу, які ёсць Любоў і Праўда.

Традыцыйна Тыдзень малітваў аб адзінстве хрысціянаў праходзіць ва ўсім свеце з 18 па 25 студзеня.

Яго тэмай у гэтым годзе сталі словы з кнігі прарока Ісаі: “Рабіце дабро, шукайце справядлівасці” (Іс 1, 17). Выбар тэмы і падрыхтоўку матэрыялаў ажыццявіла група хрысціянаў са Злучаных Штатаў Амерыкі.

Прэс-служба Гродзенскай дыяцэзіі

Фота: Аляксей Ціхан

10 чэрвеня ў капліцы Вышэйшай духоўнай семінарыі ў Гродне адбылася святая Імша на заканчэнне 2020/2021 навучальнага года. Гэта быў ужо трыццаць першы год у гісторыі гэтай навучальнай установы.

Эўхарыстыю ўзначаліў Апостальскі адміністратар sede vacante Мінска-Магілёўскай архідыяцэзіі біскуп Казімір Велікаселец,

У Імшы ўдзельнічалі біскуп Гродзенскі Аляксандр Кашкевіч, Генеральны вікарый Гродзенскай дыяцэзіі біскуп Юзаф Станеўскі, Генеральны вікарый Мінска-Магілёўскай архідыяцэзіі біскуп Юрый Касабуцкі, выкладчыкі і свецкія супрацоўнікі семінарыі і самі семінарысты.

Усіх прысутных у капліцы – сэрцы семінарыі – прывітаў рэктар кс. Віталій Вайцяхоўскі. Святар адзначыў, што гэта радасны дзень, які дае магчымасць зірнуць на пройдзены шлях, што вядзе ў семінарыйнай фармацыі да Хрыстовага алтара.

У гаміліі біскуп Юзаф Станеўскі казаў пра важнасць падтрымкі на шляху да святарскага служэння з боку народнай пабожнасці, якая ў кожнай дыяцэзіі нашай краіны адметная, але ў той жа час заўсёды аднолькавая, “бо сэрца чалавека ў канчатковым выніку прагне адно і тое ж”. “Зразумела, народная пабожнасць часам павярхоўная. Аднак праз яе вера ўвайшла ў сэрцы людзей, стала часткай іх пачуццяў, іх звычак і жыцця. Таму народная пабожнасць – гэта вялікі скарб Касцёла”, – дадаў іерарх.

Біскуп падкрэсліў, што семінарыйны шлях – перыяд навучання адзін з адным і адзін ад аднаго. “Выплываючы на глыбіню нашага паклікання, як разважаў святы Ян Павел ІІ, кандыдат рыхтуецца да прыняцця Дару і зразумення Таямніцы святарства. Гэтае рашэнне выспявае і ў асабістых сустрэчах з веліччу і слабасцю чалавечага існавання”, – сказаў іерарх.

Таксама ён адзначыў, што семінарыя – гэта супольнасць у руху, пiлігрымскі шлях, са свaімі складанасцямі. “У суіснаванні, якое часам бывае складаным, трэба навучыцца быць шчодрымі, і не толькі мірыцца адзін з адным, але і ўзбагачаць адзін аднаго, каб кожны мог прынесці свае асабістыя таленты ў агульную скарбніцу, бо ўсе яны служаць той самай справе фармацыі”, – звярнуў увагу Генеральны вікарый дыяцэзіі.

Падчас Імшы семінарысты дзякавалі Богу за чарговы год фармацыі, за ўсе дасягненні ў навуковай і духоўнай сферах, за ўсіх выкладчыкаў, якія з вялікай адданасцю і самапрысвячэннем стараліся перадаць ім як мага больш ведаў і дзяліліся жыццёвым вопытам.

На заканчэнне Эўхарыстыі біскуп Аляксандр Кашкевіч падсумаваў завершаны навучальны год, выразіўшы надзею, што кожны з семінарыстаў яшчэ больш навучыўся любіць бліжніх, цаніць і шанаваць тых канкрэтных людзей, якіх Пан Бог у сваім Провідзе паставіў на іх жыццёвым шляху.

Іерарх выказаў таксама словы ўдзячнасці ўсім, якія сваім служэннем, працай і руплівасцю ўнеслі свой асабісты ўклад у дзейнасць гродзенскай Alma Mater. Ён падзякаваў рэктару, выхаваўцам і спаведнікам, усім духоўным і свецкім супрацоўнікам семінарыі за працу перадавання ведаў студэнтам.

Звярнуўшыся да семінарыстаў з нагоды заканчэння чарговага навучальнага года, пастыр Касцёла на Гродзеншчыне падкрэсліў, што семінарыйная фармацыя мае розныя аспекты: інтэлектуальны, духоўны, пастырскі і чалавечы.

“Усе гэтыя аспекты важныя, бо толькі тады, калі яны ўтвараюць разам гарманічную еднасць, можна казаць пра ўдалую, усебаковую фармацыю, здольную падрыхтаваць сапраўдных святароў паводле Сэрца Езуса”, – сказаў іерарх.

Семінарыстам ён пажадаў, каб летні час праходзіў радасна і спакойна, a таксама быў нагодай даваць добрае сведчанне бліжнім, спрыяў паглыбленню і ўзмацненню іх асабістай духоўнай сувязі з Езусам Хрыстом.

Кс. Юрый Марціновіч

Фота: Павел Леановіч

7 мая ў капліцы Міждыяцэзіяльнай вышэйшай духоўнай семінарыі ў Гродне семінарысты памаліліся аб супакоі для душы ксяндза інфулата Станіслава Кучынскага, першага рэктара іх Alma Mater, які адышоў у вечнасць 25 гадоў таму.

Урачыстую Эўхарыстыю ўзначаліў дапаможны біскуп Гродзенскай дыяцэзіі Юзаф Станеўскі, які звярнуўся да прысутных са словам пра легендарнага ксяндза інфулата.

У гаміліі іерарх узгадаў жыццёвы шлях святара, які стаяў ля вытокаў адраджэння семінарыі. Яго лёс склаўся няпроста: прыняўшы прэзбітэрскае пасвячэнне незадоўга да верасня 1939 года, малады святар узяў на сябе ўвесь цяжар адказнасці за давераную яму парафію ў Свіры: там пасля ад’езду пробашча вікарый застаўся адзін. Гады вайны, складанае прабыванне ў парафіі ў Шэметаве пры савецкай уладзе, адраджэнне гродзенскай семінарыі – кожны крок на святарскім шляху патрабаваў ад ксяндза Станіслава Кучынскага пацвярджэння вернасці прысязе, прынесенай ля алтара Пана падчас пасвячэння.

“Ксяндза інфулата можна назваць узорам паслухмянасці. Ён умеў распазнаваць голас Божы ў голасе настаяцеляў, таму без ваганняў прыняў заклік арцыбіскупа Тадэвуша Кандрусевіча ўзначаліць адроджаную ў Гродне семінарыю. А ягоным дэвізам, з якім першы рэктар часта звяртаўся да семінарыстаў, сталі словы: «Не зявай!» На ўвазе ён меў гатоўнасць заўсёды ісці далей, заўсёды быць гатовым да новых выклікаў”, – падкрэсліў біскуп Юзаф Станеўскі.

Менавіта за вялікія заслугі перад Богам і Касцёлам ксёндз Станіслаў Кучынскі быў удастоены годнасці інфулата. Нават у сталым веку ён не забываўся і пра сваіх шэметаўскіх парафіян, да якіх час ад часу наведваўся ў госці. Памёр святар 8 мая 1996 года і быў пахаваны ля роднага касцёла ў Альковічах. Памяць пра яго і сёння жыве ў сэрцах вернікаў і семінарыстаў.

Арцём Кір’янаў

Фота: Павел Леановіч

21 лютага Яго Эксцэленцыя ганаровы мітрапаліт Мінска-Магілёўскі арцыбіскуп Тадэвуш Кандрусевіч удзяліў паслугі акалітату навучэнцам 4-га курса, а 5-курснік ВДС стаў кандыдатам да праняцця дыяканату.

Акалітамі сталі клерыкі 5 курса Яўген Абрамаў і Віталь Гурэц, а таксама 4-курснікі Арцём Кір'янаў, Павел Пагасай і Аляксандр Шыманскі. Кандыдатам жа да святарства быў прызнаны сёння навучэнец 5 курса Андрэй Юхнік.

"З гэтага моманту акаліты будуць непасрэдна ўдзельнічаць у здзяйсненні Эўхарыстыі, дапамагаючы святару. Прычым не толькі дакранацца да Найсвяцейшага Цела Езуса Хрыста, але і несці яго далей - вернікам і патрабуючым хворым. Устанаўленне ж у кандыдаты - гэта выраз таго даверу, які Касцёл выказвае таму, хто мае намер у будучыні служыць Богу і людзям", - адзначыў падчас гаміліі арцыбіскуп.

Прыняццю паслуг папярэднічалі трохдзённыя велікапосныя рэкалекцыі, якія завершыліся напярэдадні семінарыйнай урачыстасці. Гэтыя дні паспрыялі падрыхтоўцы клерыкаў да чарговага адказнага кроку на шляху да святарства.

Тэкст: Арцём Кір'янаў

Фота: Павел Леановіч

Духоўныя практыкаванні для клерыкаў з 17 па 20 лютага правёў ганаровы мітрапаліт Мінска-Магілёўскі арцыбіскуп Тадэвуш Кандрусевіч.

Асаблівыя дні штогадовых велікапосных рэкалекцый - надзвычай каштоўны час, бо менавіта духоўныя практыкаванні ў атмасферы засяроджання нярэдка дапамагаюць нанова адкрыць адносіны з Богам і паглыбіць іх, каб спаўняць волю Пана ў сваім жыцці.

Сёлета рэкалекцыі для семінарыстыў праводзіў Яго Эксцэленцыя ганаровы мітрапаліт Мінска-Магілёўскі ксёндз арцыбіскуп Тадэвуш Кандрусевіч. Пастыр прысвяціў дні духоўных разважанняў адразу некалькім тэмам. Ён засяродзіў увагу ўдзельнікаў рэкалекцый на важнасці навяртання і пакуты, семінарыйнай фармацыі, малітвы і Эўхарыстыі ў жыцці святара, адносінаў з Паннай Марыяй, а таксама пытанням цэлібату і сталай фармацыі.

"Але галоўнае - быць і заставацца чалавекам. Тады святар будзе менавіта тым чалавекам, да якога вернікаў прыцягвае, нібыта магнітам", -- падкрэсліў ганаровы мітрапаліт падчас аднаго з разважанняў.

У семінарыйнай капліцы навучэнцы збіраліся на ўрачыстую Ютрань і Камплету, падчас адарацыі Найсвяцейшага Сакрамэнта. Пятніца была прысвечана пакутным набажэнствам - Крыжоваму шляху і сакрамэнту пакаяння. Цэнтрам жа кожнага дня духоўных практыкаванняў стала Святая Імша - жывая сустрэча з Езусам у Эўхарыстыі.

Адным з найбольш цікавых пунктаў праграмы стала нефармальная сустрэча з ганаровым мітрапалітам. Яго Эксцэленцыя не толькі распавёў пра свой досвед служэння ў Беларусі і Расіі, але таксама адказаў на хвалюючыя пытанні клерыкаў.

Як знак удзячнасці за праведзеныя рэкалекцыі семінарысты падарылі пастыру майку са здымкамі ўсіх навучэнцаў семінарыі ў Гродне.

Арцём Кір'янаў

Фота: Павел Леановіч, Аляксей Ціхан

2 лютага супольнасць Вышэйшай духоўнай семінарыі ў Гродне адзначыла свята Ахвяравання Пана.

Гэтае свята нагадвае вернікам пра евангельскую падзею, якая адбылася калісьці ў Ерузалемскай святыні. Згодна з законам Майсея, кожная жанчына, якая нарадзіла дзіця, лічылася нячыстай, не мела магчымасці ўвайсці ў святыню і павінна была прайсці абрад ачышчэння, а першанец кожнага павінен быць ахвяраваны Богу як знак падзякі за выратаванне першанцаў падчас Зыходу з Егіпта.

Такі абрад чакаў і сям’ю з Назарэта. Марыі і Юзафу належала прынесці ў ахвяру пару туркавак або дзвюх галубак, што яны і ўчынілі. Такім чынам Ерузалемская святыня стала месцам сустрэчы Бога з чалавецтвам, а ахвяраванне Езуса ў святыні – правобразам ахвяры, якую потым Ён прынёс Богу Айцу на крыжы.

Раніцай, абудзіўшыся крыху пазней, чым заўсёды, семінарысты сабраліся ў капліцы на супольнай Ютрані, тэксты якой у гэты дзень засяроджваліся на падзеі ахвяравання Езуса ў святыні і былі насычаны глыбокім зместам.

Паразважаўшы над урыўкам Евангелля, прызначаным на свята Ахвяравання, будучыя святары чакалі распачацця галоўнай падзеі дня – св. Імшы.

Як паведамляе vdsgrodna.by, святочную Эўхарыстыю ўзначаліў дапаможны біскуп Гродзенскай дыяцэзіі Юзаф Станеўскі. Канцэлебравалі Імшу ксёндз прэлат Ежы Лявіньскі і выхавацелі семінарыі на чале з рэктарам кс. Віталіем Вайцяхоўскім.

Падчас Імшы ўся семінарыная супольнасць малілася за кансэкраваных асобаў – тых, кто прысвяціў сваё служэнне Богу і Касцёлу, аб новых пакліканнях і развіцці кансэкраванага жыцця.

Андрэй Юхнік

Фота: Павел Леановіч

1 лютага 2014 г. Касцёл на Гродзеншчыне атрымаў дапаможнага біскупа, якім стаў тагачасны рэктар Вышэйшай духоўнай семінарыі ў Гродне ксёндз прэлат Юзаф Станеўскі.

Яго біскупскае пасвячэнне прайшло ў гродзенскай катэдры св. Францішка Ксавэрыя.

З таго радаснага моманту ўжо мінула сем насычаных служэннем Касцёлу на Беларусі гадоў.

Як паведамляе vdsgrodna.by, у сваю чарговую гадавіну прыняцця біскупскай сакры дапаможны біскуп і Генеральны вікарый Гродзенскай дыяцэзіі Юзаф Станеўскі на світанку цэлебраваў св. Імшу ў капліцы Вышэйшай духоўнай семінарыі ў Гродне.

За сем гадоў апостальскага служэння біскупа Юзафа Станеўскага таксама дзякавалі Богу выхавацелі і навучэнцы семінарыі – менавіта тыя, з кім іерарх праводзіць сваё паўсядзённае жыццё.

У гаміліі біскуп заахвоціў як семінарыстаў, так і прысутных святароў да пакорнага служэння Касцёлу незалежна ад свайго статусу, пасады, узросту і магчымасцяў. “Пакліканы не таму, што святы, а святы таму, што пакліканы”, – так нагадаў іерарх аб тым, што у першую чаргу ўсе мы пакліканы да святасці.

Андрэй Юхнік

Фота: Павел Леановіч

9 студзеня, адразу пасля заканчэння калядных канікул, навучэнцы Вышэйшай духоўнай семінарыі ў Гродне сабраліся на чарговы дзень засяроджання. Святы час семінарысты правялі ў малітве і ціхім роздуме.

Іх суправаджаў на гэтым шляху вікарый гродзенскай катэдры ксёндз Алег Канановіч. На аснове нядаўняга ліста Папы Францішка “Patris corde” святар разважаў пра асобу святога Юзафа.

“Часта святы Юзаф прадстаўляецца як ідэал для бацькі – галавы сям'і. І рэдка ён становіцца прыкладам для цяперашніх і будучых святароў. Але менавіта ад Апекуна Святой Сям'і мы можам навучыцца ягонаму ўменню ставіць сябе на другі план, любіць чыстай любоўю. Святы Юзаф вучыць нас пастаянна ўглядацца ў Езуса, пытаючы самога сябе, ці годны я дакранацца да Яго”, – падкрэсліў ксёндз Алег Канановіч. 

У праграму дня засяроджання, прысвечанага асобе святога Юзафа, увайшлі супольны Брэвіярый, Ружанец і адарацыя Найсвяцейшага Сакрамэнту. Заканчэннем духоўных практыкаванняў стала ўрачыстая святая Імша ў семінарыйнай капліцы.

Арцём Кір'янаў 

Фота: Павел Леановіч

18 снежня навучэнцы Вышэйшай духоўнай семінарыі ў Гродне здалі апошнія залікі, а таксама скончыліся лекцыі і заняткі першага семестра. Традыцыйна перад ад’ездам на святочныя канікулы ў семінарыі адбылася аплаткавая сустрэча.

Кожны год, каб падзяліцца аплаткай і павіншаваць адзін аднаго, збіраецца вялікая колькасць гасцей, выкладчыкаў і працаўнікоў, якія працавалі і працуюць у семінарыі. Але сёлета ў сувязі са складанай эпідэміялагічнай сітуацыяй сустрэча прайшла ў вельмі блізкім коле: акрамя семінарыстаў і мадэратараў семінарыі былі запрошаны толькі тыя працаўнікі, якія штодзённа цесна кантактуюць з семінарыстамі. 

Са словамі прывітання да прысутных звярнуўся дапаможны біскуп Гродзенскай дыяцэзіі Юзаф Станеўскі, які перадаў святочныя віншаванні для семінарыйнай супольнасці ў Гродне ад Мітрапаліта Мінска-Магілёўскага арцыбіскупа Тадэвуша Кандрусевіча. Пазней усе маглі павіншаваць адзін аднаго з надыходзячымі святамі Божага Нараджэння, дзелячыся аплаткамі.

Семінарысты распавялі пра традыцыі вігілійнай вячэры і святкавання Божага Нараджэння і прачыталі некалькі вершаў. Суправаджалася сустрэча спевамі калядак музычнага гурта “AVE”. 

На заканчэнне сустрэчы рэктар кс. Віталь Вайцяхоўскі падзякаваў прысутным за адданасць, працу і ўклад у функцыянаванне семінарыі, а таксама пажадаў знайсці праўдзівую радасць і спакой, якія нясе нованароджаны Езус.

Aндрэй Юхнік

Фота: Павел Леановіч