7 чэрвеня біскуп Гродзенскі Аляксандр Кашкевіч наведаў маладую парафію благаслаўлёнай Мар’яны Бярнацкай у Гродне (Сапоцкінскі дэканат).

На ўрачыстай святой Імшы іерарх удзяліў сакрамэнт хрысціянскай сталасці моладзі і дарослым вернікам парафіі – 37 чалавекам. Таксама сакрамэнт прынялі 10 маладых вернікаў суседняй парафіі Маці Божай Ружанцовай у Падлабенні.

На Эўхарыстыі ў часовай капліцы, побач з якой будуецца касцёл, сабраліся шматлікія парафіяне і госці.

Усіх прысутных прывітаў кс. канонік Юрый Марціновіч, пробашч парафіі. Святар назваў гэты дзень асаблівым, бо сакрамэнт канфірмацыі ўпершыню ўдзяляецца на тэрыторыі гэтай парафіі, дзе, як можна верыць, у недалёкай будучыні паўстане прыгожы касцёл.

На Эўхарыстыі прысутныя маліліся аб шчаслівым будаўніцтве святыні, у інтэнцыі ўсіх дабрадзеяў, якія падтрымліваюць яго сваёй малітвай, працай, ахвяраваннямі.

У гаміліі генеральны вікарый Гродзенскай дыяцэзіі кс. канонік Аляксандр Мацкевіч падкрэсліў важнасць сакрамэнту канфірмацыі, які абавязвае вызнаваць веру і быць яе сведкам у тым месцы, дзе чалавека паставіць Божы Провід.

На заканчэнне Імшы канфірмаваныя выказалі ўдзячнасць біскупу, свайму душпастыру, катэхетам і ўсім, хто прычыніўся да падрыхтоўкі ўрачыстасці.

Пастыр Касцёла на Гродзеншчыне заахвоціў парафіян, асабліва маладых людзей, штодзённа жыць верай і быць апосталамі ў месцах сваёй вучобы і працы.

Вернікам гэтай парафіі іерарх пажадаў надзеі, каб працягваць з Божай дапамогай і пры ўдзеле людзей добрай волі ўзводзіць святыню, так патрэбную мясцовай супольнасці.

Таксама біскуп Аляксандр падкрэсліў важнасць стварэння жывой святыні, якая складаецца з чалавечых сэрцаў, назваўшы гэта не менш важным, чым будаўніцтва касцёла матэрыяльнага.

Іерарх падзякаваў пробашчу за працу стварэння парафіі і будаўніцтва святыні, пажадаў усёй супольнасці моцы і адвагі ў здзяйсненні гэтай важнай справы.

Прэс-служба Гродзенскай дыяцэзіі

Фота: Міхал Міклашэвіч, Артур Антушэвіч

28 мая, ва ўрачыстасць Спаслання Духа Святога, сакрамэнт хрысціянскай сталасці прынялі вернікі парафіі Найсвяцейшай Тройцы ў Зэльве (Слонімскі дэканат).

Святую Імшу, на якой быў удзелены сакрамэнт, узначаліў у парафіяльным касцёле дапаможны біскуп Мінска-Магілёўскай архідыяцэзіі Аляксандр Яшэўскі SDB.

Разам з іерархам Эўхарыстыю канцэлебравалі пробашч парафіі ў Зэльве кс. Яцэк Маркель, пробашч парафіі ў Азёрах кс. Томаш Ксёнжкевіч і пробашч парафіі ў Міжэрычах кс. Дзяніс Шмыгін.

Як паведамляе zelwa.by, вернікі шчыра прывіталі біскупа, сустрэўшы яго прыгожым караваем і спевамі, у якіх праслаўлялі Пана Бога, Найсвяцейшую Панну Марыю і Духа Святога.

Пробашч, вітаючы ўдзельнікаў урачыстасці, адзначыў, што прысутнасць біскупа – не толькі яго першы візіт на зэльвенскую зямлю і ў гэтую парафію, але і знак умацавання веры, увасабленне Першасвятара Езуса Хрыста, які прыходзіць да кожнага верніка: “Для зэльвенцаў гэта вельмі важны момант, бо праз такую значную сустрэчу мы ўсе разам будзем дзякаваць Богу і прасіць аб веры для кожнага, для ўсёй супольнасці”.

У гаміліі біскуп адзначыў, што канфірмацыя – сакрамэнт, у якім чалавек надзяляецца дарамі Духа і яшчэ мацней звязваецца з супольнасцю Касцёла.

“Давайце вызнаваць сваю веру, не цурацца яе. Бог сваёй айцоўскай любоўю прабачыць нам не адзін грэх за тое, што мы праз жыццё пранеслі веру і былі Яму верныя”, – сказаў іерарх.

Ён заклікаў тых, хто прыступаў у гэты дзень да канфірмацыі, заўсёды быць сапраўднымі хрысціянамі, пажадаўшы, каб Дух Святы распаліў у іх душах любоў да Бога і бліжняга.

Канфірмаваныя парафіяне і іх бацькі выказалі падзяку біскупу. Словы падзякі былі выказаны таксама пробашчу, які клапаціўся аб падрыхтоўцы моладзі і дарослых да гэтай урачыстасці і паказвае прыклад хрысціянскага веравызнання.

Пасля Імшы вернікі падзяліліся ўражаннямі.

“Вельмі хваляваліся падчас падрыхтоўкі і на пачатку Імшы, – кажуць дзяўчынкі Арына і Паліна. – Хваляванне трошкі пачало праходзіць, калі біскуп Аляксандр падзяліўся сваімі першымі ўражаннямі аб зэльвенскай святыні, адзначыўшы, што яму спадабаліся не толькі прыгожая ўладкаваная прыкасцёльная тэрыторыя і ўнутранае ўбранства касцёла, але і вялікая супольнасць вернікаў, якая сабралася, каб разам памаліцца, прызнацца ў сваёй веры і раздзяліць радасць канфірмацыі. Пасля дотыку біскупа стала неяк лёгка і спакойна. Упэўнены, што пранясём веру ў Бога праз усё жыццё”.

“Была сур’ёзная падрыхтоўка да канфірмацыі, найперш духоўная, – дзеляцца Ірына, Марыя і Аліна. – Сумленна і шчыра падышлі да прыняцця сакрамэнту і адкрываем свае душы насустрач Духу Святому, праз якога будзем праслаўляць любоў да Бога, з якім будзем крочыць па жыцці”.

“Самае галоўнае – я жыву з Богам, я крочу з Ім па жыцці, мяне аберагае Святы Дух, – выказвае сваю думку Ганна. – За гэта я вельмі ўдзячна, у першую чаргу, ксяндзу Яцэку, бацькам, родным. Сённяшняя ўрачыстасць – нагода да радасці, што я разам з іншымі хрысціянамі буду вызнаваць сваю каталіцкую веру і прызнавацца ў любові да Бога, да бліжняга”.

27 мая, у вігілію ўрачыстасці Спаслання Духа Святога, біскуп Гродзенскі Аляксандр Кашкевіч наведаў парафіяльную супольнасць Найсвяцейшай Тройцы ў Індуры (дэканат Гродна-Захад).

На Імшы ў парафіяльнай святыні іерарх удзяліў сакрамэнт хрысціянскай сталасці групе моладзі, падрыхтаванай да гэтага адпаведным чынам.

Біскуп цэлебраваў Імшу ў інтэнцыі маладых людзей, узбагачаных у гэты дзень сямю дарамі Духа Святога, а таксама за ўсіх, хто ўтварае парафіяльную сям’ю на чале з яе пробашчам кс. Паўлам Астукевічам.

У гаміліі сакратар біскупа Гродзенскага кс. канонік Юрый Марціновіч казаў пра тое, што важна адкрыцца на дзеянне Духа, які, калі прыняць Яго з верай, здольны перамяніць наша жыццё, надаць яму сэнс і значэнне.

На заканчэнне Эўхарыстыі біскуп Аляксандр Кашкевіч, звяртаючыся да канфірмаваных, адзначыў, што сведкам быць у сучасным свеце нялёгка. Таму ён падкрэсліў важнасць вялікай адвагі, а найперш глыбокай веры, каб пераадолець усе цяжкасці і пагрозы, якія нясе сённяшні свет.

Пробашч парафіі кс. Павел Астукевіч падзякаваў біскупу за ўдзяленне вернікам сакрамэнту канфірмацыі і выказаў надзею, што атрыманыя дары Духа Святога прычыняцца да духоўнага ўзрастання ў іх жыцці.

Прэс-служба Гродзенскай дыяцэзіі

25 мая ў катэдральным касцёле святога Францішка Ксаверыя ў Гродне група вернікаў прыступіла да сакрамэнту хрысціянскай сталасці. Сакрамэнт удзяліў біскуп Гродзенскі Аляксандр Кашкевіч.

Святую Імшу, на якой вернікі былі намашчаны алеем хрызма, іерарх цэлебраваў у іх інтэнцыі, просячы аб ласцы моцнай веры і адвагі для іх, каб яны маглі штодзённа даваць сведчанне прыналежнасці да вялікай сям’і Касцёла.

Звяртаючыся да тых, хто ў гэты дзень быў узбагачаны сямю дарамі Духа Святога, біскуп падкрэсліў, што гэты сакрамэнт патрэбны, каб не падпарадкоўвацца тэндэнцыям сучаснага свету, а жыць Божым Словам, трываючы ў веры, і пастаянна быць у стане асвячальнай ласкі.

Біскуп выказаў словы ўдзячнасці бацькам, якія паклапаціліся аб рэлігійным выхаванні сваіх дзяцей, сталі іх першымі катэхетамі, далі прыклад добрага хрысціяніна.

Маладыя вернікі, якія прыступілі да канфірмацыі, падзякавалі ўсім, хто рыхтаваў іх да гэтай падзеі. Яны выказалі падзяку за вялікі ўнёсак у іх падрыхтоўку сваім душпастырам і катэхетам на чале з пробашчам парафіі кс. канонікам Янам Кучынскім. Як адзначылі яны, гэты дзень значыць для іх вельмі шмат, абавязвае мужна вызнаваць сваю веру і паступаць паводле яе прынцыпаў.

Прэс-служба Гродзенскай дыяцэзіі

18 мая, ва ўрачыстасць Унебаўшэсця Пана, у парафіі Божай Міласэрнасці ў Гродне (Вішнявец) біскуп Гродзенскі Аляксандр Кашкевіч на святой Імшы ўдзяліў сакрамэнт канфірмацыі групе вернікаў.

На пачатку Імшы іерарх заклікаў кандыдатаў да канфірмацыі адкрыцца на Духа Святога і сем Ягоных дароў: мудрасцi, розуму, рады, мужнасцi, умеласцi, пабожнасцi i боязі Божай.

Падыходзячы да біскупа, маладыя людзі і іншыя вернікі парафіі атрымлівалі намашчэнне алеем святога хрызма. Кожнаму з іх біскуп адрасаваў словы: “Прымі знак Духа Святога”.

Такім чынам яны ўзялі на сябе абавязак быць адважнымі вызнаўцамі сваёй веры і дазволілі запалаць у сабе Божай любові, каб занесці Добрую Навіну аб Езусе Хрысце іншым людзям, асабліва тым, хто знаходзіцца далёка ад Касцёла.

На заканчэнне Эўхарыстыі біскуп Аляксандр Кашкевіч заклікаў тых, хто прыступіў да сакрамэнту канфірмацыі, штодзённа сведчыць пра Уваскрасенне Хрыста.

Гэты сакрамэнт хрысціянін прымае не толькі для сябе, але і для дабра іншых. Таму біскуп адзначыў, што дар Духа Святога праз пасрэдніцтва тых, хто яго атрымаў, павінен перамяняць людзей: дасягнуць іх, каб яны маглі спазнаць блізкасць Бога, які адорвае любоўю і надзеяй.

Канфірмаваныя падзякавалi іерарху за тое, што ўмацаваў іх гэтым сакрамэнтам. Таксама яны падзякавалі сваім душпастырам і катэхетам на чале з пробашчам парафіі кс. Янам Этэлем SCJ за падрыхтоўку да гэтай значнай у іх жыцці падзеі.

Прэс-служба Гродзенскай дыяцэзіі

21 мая біскуп Гродзенскі Аляксандр Кашкевіч на святой Імшы ў касцёле Адшукання Святога Крыжа ў Гродне (пабернардынскі) удзяліў сакрамэнт канфірмацыі маладым парафіянам.

Вернікі прынялі сакрамэнт хрысціянскай сталасці ў асаблівы час чакання ўрачыстасці Спаслання Духа Святога.

Гэты сакрамэнт такі ж важны, як і іншыя. Яго прымаюць у дарослым узросце для таго, каб чалавек станавіўся сапраўдным вызнаўцам Езуса Хрыста і мог заўсёды абараніць веру.

Пра абавязак абвяшчэння Евангелля Хрыста біскуп Аляксандр Кашкевіч нагадаў у гаміліі. Таксама іерарх заахвоціў кандыдатаў, каб яны ўсім сэрцам давяралі Езусу і “імкнуліся за Ім да таго, што добрае, прыгожае і ўзнёслае”.

На заканчэнне Эўхарыстыі маладыя людзі падзякавалі біскупу і святарам, якія рыхтавалі іх да гэтага дня, а таксама сваім родным, якіх назвалі сваімі сведкамі веры.

Прэс-служба Гродзенскай дыяцэзіі

10 мая біскуп Гродзенскі Аляксандр Кашкевіч наведаў парафіяльную супольнасць св. Тэрэзы Авільскай у Шчучыне. На святой Імшы іерарх удзяліў сакрамэнт канфірмацыі маладым i старэйшым вернікам гэтай парафіі.

На пачатку Эўхарыстыі бацькі кандыдатаў да канфірмацыі падкрэслілі, што гэта выключны дзень для іх дзяцей, калі яны адкрываюцца на Божыя дары, якія так патрэбны, каб ісці праз штодзённае жыццё.

У гаміліі кс. канонік Юрый Марціновіч, сакратар біскупа Гродзенскага, адзначыў, што сакрамэнт канфірмацыі, калі прымаецца з верай, робіць чалавека цалкам іншым, дазваляе яму жыць па-Божаму і быць адважным у сённяшнім свеце.

На заканчэнне літургіі біскуп Аляксандр Кашкевіч заклікаў парафіян, якія прыступілі да сакрамэнту, быць для свету жывым Евангеллем і паказваць іншым шлях да Бога сваім прыкладам.

Прэс-служба Гродзенскай дыяцэзіі

8 мая ў парафіі ў Каробчыцах (дэканат Гродна-Захад) адзначалася адпустовая ўрачыстасць у гонар яе апекуна св. Станіслава, біскупа і мучаніка. Ужо некалькі гадоў у парафіі знаходзяцца рэліквіі гэтага святога.

Урачыстую Імшу цэлебраваў біскуп Гродзенскі Аляксандр Кашкевіч у інтэнцыі ўсёй парафіяльнай супольнасці, якая будуе свой касцёл св. Максімільяна Кольбэ і св. Станіслава.

На Эўхарыстыі група вернікаў, пераважна моладзь, была ўзбагачана сямю дарамі Духа Святога ў сакрамэнце канфірмацыі.

У гаміліі кс. канонік Юрый Марціновіч, сакратар біскупа Гродзенскага, падкрэсліў, што св. Станіслаў атрымаў ад Пана Бога шмат дароў, а найбольшым з іх была чуласць да чалавечых бед і крыўдаў. Святы выклікаў прыхільнасць людзей сваёй мудрасцю, лагоднасцю і разуменнем.

На заканчэнне Эўхарыстыі біскуп Аляксандр Кашкевіч звярнуўся да вернікаў, якія прынялі сакрамэнт хрысціянскай сталасці. Пастыр Касцёла на Гродзеншчыне пажадаў, каб дары Духа Святога дапамагалі ім крочыць дарогамі веры і прымаць жыццёвыя рашэнні.

Пробашч парафіі кс. Ян Рушніцкі, дэкан дэканату Гродна-Захад, падзякаваў іерарху за тое, што ён памаліўся разам з парафіянамі ў дзень успаміну іх нябеснага апекуна. Тыя, хто прыступіў да канфірмацыі, выказалі ўдзячнасць за падрыхтоўку свайму душпастыру і сястры Магдаліне Кулай CSCII.

Прэс-служба Гродзенскай дыяцэзіі

7 мая, калі ў Гродзенскай дыяцэзіі адзначаўся Дзень маці, біскуп Гродзенскі Аляксандр Кашкевіч наведаў санктуарый Маці Божай Шкаплернай у Гудагаі (Астравецкі дэканат).

На Эўхарыстыі ў дыяцэзіяльным санктуарыі асабліва маліліся ў інтэнцыі ўсіх маці – жывых і памерлых.

Таксама біскуп удзяліў сакрамэнт хрысціянскай сталасці групе вернікаў мясцовай парафіі, адпаведным чынам падрыхтаваных да гэтага.

У канцы святой Імшы пастыр Касцёла на Гродзеншчыне заахвоціў канфірмаваных трываць у веры і быць сведкамі Уваскрослага Пана ў сваім асяроддзі.

Пробашч парафіі а. Аркадзь Куляха OCD падзякаваў біскупу за ўдзяленне сакрамэнту і прыбыццё ў санктуарый.

Прэс-служба Гродзенскай дыяцэзіі

Фота: Юлія Міхалевіч

6 мая біскуп Гродзенскі Аляксандр Кашкевіч наведаў парафіяльную супольнасць святых апосталаў Пятра і Паўла ў Граўжышках (Ашмянскі дэканат).

На Эўхарыстыі іерарх удзяліў сакрамэнт хрысціянскай сталасці вернікам гэтай парафіі.

На Імшы сабраліся шматлікія парафіяне і госці, у тым ліку духавенства на чале з дэканам Ашмянскага дэканату кс. канонікам Янам Пузынам.

Біскуп цэлебраваў Імшу ў інтэнцыі тых, хто ў гэты дзень прымаў дары Духа Святога ў канфірмацыі, молячыся аб глыбокай веры для іх, і ў інтэнцыі ўсёй парафіяльнай сям’і на чале з яе пробашчам кс. Паўлам Раманоўскім.

Звяртаючыся да тых, хто прыступаў да канфірмацыі, біскуп падкрэсліў, што Дух Святы, якога прымае чалавек у гэтым сакрамэнце і які калісьці сышоў на апосталаў у вячэрніку, дае здольнасць быць вучнем Хрыста Пана, але для гэтага неабходна адкрыць сэрца на дзеянне Божай ласкі.

Таму пастыр Касцёла на Гродзеншчыне заахвоціў іх заўсёды быць побач з Езусам, спаўняць Божыя запаведзі, быць здольнымі любіць, прабачаць, служыць Богу і бліжнім.

На заканчэнне Эўхарыстыі прадстаўнікі канфірмаваных вернікаў выказалі біскупу ўдзячнасць за ўдзяленне сакрамэнту. Таксама яны падзякавалі свайму пробашчу за падрыхтоўку да гэтай важнай у іх жыцці падзеі.

У сваю чаргу кс. Павел Раманоўскі падзякаваў усім прысутным, у тым ліку гасцям, за супольны ўдзел у Эўхарыстыі.

Прэс-служба Гродзенскай дыяцэзіі

1 мая ў парафіі ў Скідзелі (дэканат Гродна-Усход) адбылася адпустовая ўрачыстасць у гонар св. Юзафа, рамесніка, апекуна парафіі.

Парафіяльную супольнасць наведаў у гэты дзень біскуп Гродзенскі Аляксандр Кашкевіч. На ўрачыстай святой Імшы іерарх удзяліў сакрамэнт канфірмацыі групе вернікаў. Сакрамэнт прынялі вернікі гэтай парафіі і яшчэ дзвюх парафій дэканату: Хрыста Валадара Сусвету ў Азёрах і новай парафіі бл. Міхала Сапоцькі ў Абухаве.

Вітаючы біскупа, прэзбітэраў, якія прыбылі на свята, і ўсіх прысутных, пробашч кс. канонік Цэзары Міх адзначыў, што адпустовая ўрачыстасць – заўсёды асаблівы для парафіі дзень, калі думкі і малітвы вернікаў скіраваны да іх апекуна, які шмат гадоў клапоціцца аб іх супольнасці.

У гаміліі кс. канонік Юрый Марціновіч, прэс-сакратар Гродзенскай дыяцэзіі, звярнуў увагу, што святы Юзаф – маўклівы святы – атрымаў ад Бога шмат падарункаў і дароў.

Святар падкрэсліў, што і сёння Створца дае кожнаму свае дары і ласкі, ні для каго не шкадуе гэтых дароў, бо ажно сем іх атрымлівае чалавек, прымаючы сакрамэнт хрысціянскай сталасці.

Завяршэннем адпустовай урачыстасці была эўхарыстычная працэсія вакол святыні, падчас якой вернікі дзякавалі Езусу за прысутнасць сярод іх у Эўхарыстыі.

Біскуп Кашкевіч на заканчэнне заклікаў тых, хто быў у гэты дзень умацаваны дарамі Духа Святога ў сакрамэнце канфірмацыі, каб яны і далей з адвагай крочылі праз штодзённае жыццё і былі сведкамі Пана ў кожным месцы і ў кожны час.

Прэс-служба Гродзенскай дыяцэзіі

30 красавіка ў парафіі св. Міхала Арханёла ў Смаргоні быў удзелены сакрамэнт канфірмацыі. Да яго прыступілі 53 чалавекі – моладзь і дарослыя.

Удзяліў сакрамэнт дапаможны біскуп Мінска-Магілёўскай архідыяцэзіі Аляксандр Яшэўскі SDB.

Гэты сакрамэнт з’яўляецца на шляху хрысціянскай ініцыяцыі другім пасля хросту. Плён канфірмацыі – асаблівае ўдзяленне Духа Святога, такое, як у дзень Пяцідзясятніцы. Яно пакідае ў душы незнішчальны адбітак і садзейнічае ўзрастанню ласкі хросту: больш глыбока ўкараняе ў Божым усынаўленні; больш цесна яднае з Хрыстом і Ягоным Касцёлам; умацоўвае ў душы дары Духа; адорвае асаблівай моцай для сведчання хрысціянскай веры.

На ўрачыстасць вернікі Смаргоні сабраліся на палявым алтары побач з касцёлам. Кандыдаты да канфірмацыі прывіталі біскупа Аляксандра Яшэўскага. Са словамі прывітання да іерарха звярнуўся старшыня смаргонскага райвыканкама Генадзій Харужык, таксама ўручыўшы біскупу памятныя падарункі ад смаргонскай зямлі. Затым іерарха прывіталі вернікі традыцыйным беларускім хлебам ды соллю, а пробашч запрасіў пакланіцца Хрысту ў парафіяльнай святыні.

Музычную анімацыю ўрачыстай Імшы ажыццяўляў запрошаны з Мінска каталіцкі гурт “Vеrbum Dei”.

Пасля Літургіі Слова кандыдаты да канфірмацыі былі прадстаўлены біскупу, а пробашч выказаў яму просьбу ўдзяліць сакрамэнт хрысціянскай сталасці гэтым выбраным. Кандыдаты выказалі жаданне жыць Хрыстовым Евангеллем і мужна вызнаваць веру.

У гаміліі біскуп растлумачыў кандыдатам да канфірмацыі, чым з’яўляецца гэты сакрамэнт. Іерарх падкрэсліў важнасць і асаблівую ролю Духа Святога ў жыцці Касцёла і кожнага католіка. Таксама ён засяродзіў увагу на двух важных сімвалах дзеяння Духа Святога – ветры і вадзе, патлумачыў іх сутнасць, раскрыўшы прысутным таямніцу дзеяння Духа ў жыцці хрысціян.

Затым адбыўся абрад канфірмацыі. Біскуп і прэзбітэры, якія канцэлебравалі Імшу, ускладалі рукі на тых, хто прыступаў да сакрамэнту. Ускладанне рук – біблійны жэст, якім заклікаецца дар Духа Святога. Таксама кандыдаты атрымалі намашчэнне алеем хрызма, якое азначае плён дару Духа. Праз здзейсненае рукою біскупа намашчэнне духмяным алеем яны прынялі незнішчальны знак, пячаць Пана, разам з дарам Духа, які больш дасканала прыпадабняе іх да Хрыста і дае ласку пашыраць сярод людзей “прыемны водар”.

У працэсіі з дарамі як дар ад тых, хто ў гэтым годзе атрымаў сакрамэнт канфірмацыі, былі прынесены фэрэтрон Найсвяцейшага Сэрца Езуса, які будзе ўдзельнічаць ва ўсіх эўхарыстычных працэсіях парафіі, і рэліквіярый, у якім будуць змешчаны рэліквіі святога мучаніка, замураваныя затым у новы эўхарыстычны алтар смаргонскага касцёла.

Пасля Імшы тыя, хто прыступіў да канфірмацыі, падзякавалі Богу і біскупу за атрыманы дар. Біскуп благаславіў новы фэрэтрон і памятныя крыжы, якія забралі з сабой на памяць пра гэты дзень канфірмаваныя вернікі.

Прэс-служба Гродзенскай дыяцэзіі

16 красавіка, ў нядзелю Божай Міласэрнасці, Апостальскі нунцый у Беларусі арцыбіскуп Антэ Ёзіч наведаў Ліду (Гродзенская дыяцэзія), дзе ўзначаліў адпустовую ўрачыстасць у парафіі Божай Міласэрнасці, што ў новым лідскім мікрараёне Маладзёжны.

Прадстаўнік Папы Францішка ў Беларусі ўпершыню наведаў горад, у якім пражывае адна з найбольшых у нашай краіне каталіцкіх супольнасцяў: католікі складаюць тут больш за палову насельніцтва. Для Лідскага рэгіёна нават прызначаны асобны Біскупскі вікарый — шматгадовы пробашч парафіі Узвышэння святога Крыжа ў Лідзе ксёндз канонік Уладзімір Гуляй, які ад імя біскупа Гродзенскага Аляксандра Кашкевіча каардынуе душпастырскую і адміністрацыйную дзейнасць Касцёла на Лідчыне.

Нунцый Ёзіч прыбыў у Ліду па запрашэнні ксяндза каноніка Андрэя Зноскі, пробашча маладой мясцовай парафіі Божай Міласэрнасці, размешчанай у мікрараёне Маладзёжны, што ў паўночна-заходняй частцы горада.

Прадстаўніка Святога Айца прывіталі ў святыні спевам на яго роднай мове.

Як пазней сказаў сам Антэ Ёзіч, які паходзіць з Харватыі, гэты касцёльны спеў з яго радзімы ў выкананні парафіяльнага моладзевага хору «Спяваючыя сэрцы» пад кіраўніцтвам Веранікі Красцьянінавай «гучаў нават лепш, чым у арыгінале».

Вітаючы высокага госця і прысутнае духавенства ў запоўненай святыні, якая з’яўляецца самым вялікім касцёлам у Лідзе, ксёндз Андрэй Зноска растлумачыў вернікам, хто такі Апостальскі нунцый. Пры гэтым святар звярнуўся да Кодэкса кананічнага права — галоўнага збору касцёльных законаў, у перакладзе якога на беларускую мову ён сам браў актыўны ўдзел як дасведчаны юрыст і кананіст. Гэты пераклад Кодэкса, прэзентаваны напрыканцы мінулага года ў межах адзначэння 30-годдзя з часу ўсталявання дыпламатычных адносін паміж Святым Пасадам і Рэспублікай Беларусь, быў здзейснены па ініцыятыве нунцыя Ёзіча, і ксёндз Андрэй, па словах ватыканскага прадстаўніка, адыграў у яго падрыхтоўцы адну з галоўных роляў.

Хоць парафія ў мікрараёне Маладзёжны, у адрозненні ад тутэйшага касцёла, далёка не самая вялікая ў Лідзе, аднак на адпустовай урачыстасці сабралася больш за паўтысячы чалавек. Усе яны з вялікай радасцю віталі таксама свайго першага пробашча, ксяндза каноніка Станіслава Пацыну з Радуні. Як нагадаў у прывітальным слове ад старэйшага пакалення вернікаў старшыня парафіяльнай Рады Леон Муліца, дзякуючы душпастырскай руплівасці ксяндза Станіслава амаль трыццаць гадоў таму стварылася гэтая парафіяльная супольнасць, і неўзабаве на полі, дзе «калісьці раслі капуста і буракі», супольнымі намаганнямі вернікаў і іх пробашча вырасла цудоўная святыня ў гонар Божай Міласэрнасці.

Менавіта ксёндз Станіслаў Пацына хрысціў некаторых маладых людзей з тых 35-і асоб, якія ў парафіяльную ўрачыстасць прынялі з рук прадстаўніка Папы сакрамэнт хрысціянскай сталасці — канфірмацыю, або бежмаванне.

Звычайна ў Каталіцкім Касцёле гэты сакрамэнт удзяляе толькі біскуп. Як прызнаўся нунцый Ёзіч, ён упершыню меў магчымасць удзяліць яго толькі цяпер, у Лідзе.

Пасля таго, як ксёндз Уладзімір Гуляй прачытаў Евангелле пра тое, як апостал Тамаш, які спачатку не верыў у Змёртвыхпаўстанне Хрыста, стаў веруючым, дакрануўшыся да прабітых рук і боку Уваскрослага, пробачш прадставіў арцыбіскупу Ёзічу кандыдатаў да канфірмацыі. Паміж імі адбыўся дыялог, у якім кандыдаты пацвердзілі сваё жаданне прыняць дары Святога Духа і жыць хрысціянскай верай, даючы сваё сведчанне аб Уваскрослым.

У прамоўленай гаміліі арцыбіскуп Ёзіч перадусім сказаў, што вельмі рады ў нядзелю Божай Міласэрнасці маліцца ў парафіі, якая мае такі тытул.

«Я таксама шчаслівы, таму што ўпершыню прадстаўнік Папы наведвае вашую парафію і цэлебруе святую Імшу за вас, за вашыя сем’і, за хворых і асабліва за тых, хто рыхтаваўся прыняць сем дароў Духа Святога, каб мець магчымасць сведчыць аб сваёй веры ў штодзённым жыцці.

Для мяне таксама гэта першы раз, калі я як біскуп удзяляю канфірмацыю, і я шчаслівы, што гэта адбываецца тут, у Лідзе, у Беларусі, дзе я выконваю сваю дыпламатычную і касцёльную місію», — адзначыў Апостальскі нунцый. Іерарх дадаў, што разам са сваімі сямю дарамі Святы Дух у канфірмацыі сам сыходзіць на тых, хто прымае гэты сакрамэнт, і «прысутнасць Бога ў нас робіць нас шчаслівымі і падштурхоўвае станавіцца дарослымі, даваць сведчанне сваім жыццём. Там, дзе жыве Дух Божы, ужо няма месца граху, падзелам, войнам, але перамагаюць любоў, сяброўства, вера і справядлівасць», — сцвердзіў іерарх.

Ён запрасіў кандыдатаў «будаваць новы свет: свет без войнаў, свет, які прымае ўсіх без адрознення, перш за ўсё свет, які прымае бедных і адкінутых.

Запрашаю вас любіць сваю парафію ў Лідзе і наш Каталіцкі Касцёл у Беларусі, умацоўваючы яго сваімі малітвамі і добрымі справамі», — заахвоціў прадстаўнік Папы, завяршыўшы гамілію кароткім зваротам да Маці Божай: «Каралева Беларусі, маліся за нас».

На заканчэнне ўрачыстасці адбылася вялікая нечаканасць: прадстаўнік парафіяльнай Рады Віталій Баркоўскі зачытаў і ўручыў Апостальскаму нунцыю ліст, у якім вернікі парафіі запрасілі Святога Айца Папу Францішка наведаць Беларусь і іх супольнасць. «Дакладна ўсведамляем, які далёкі і складаны шлях з Ватыкана ў Беларусь: і гэта не пра рэкі і горы, якія трэба пераадолець, але пра межы, якія дзеляць чалавечыя сэрцы. <…> Мы не палітыкі, не ўплывовыя асобы — мы простыя людзі, якія ад продкаў атрымалі скарб веры, а разам з ім і вернасць Наступніку Святога Пятра; трываць у ёй — наш гонар.

Быць можа, Божаму Провіду не хапала толькі гэтага нясмелага запрашэння ад звычайных людзей, каб ногі Вашай Святасці маглі ступіць на зямлю нашай любай Беларусі», — было сказана ў звароце, які нунцый Ёзіч паабяцаў абавязкова перадаць Папу Францішку.

На заканчэнне ўрачыстасці яе ўдзельнікаў чакаў яшчэ адзін прыемны сюрпрыз: пасля таго, як нунцый удзяліў прысутным Апостальскае благаслаўленне, у касцёл завітаў біскуп Гродзенскі Аляксандр Кашкевіч, які, вяртаючыся з урачыстасці ў Воранаве, па дарозе не мінуў і парафію Божай Міласэрнасці ў Лідзе.

Пастыра дыяцэзіі з энтузіязмам прывіталі вернікі і запрасілі яго на супольны здымак.

Паводле Catholic.by

Фота: Антон Насовіч

13 красавіка, у сераду ў актаве Уваскрасення Пана, біскуп Гродзенскі Аляксандр Кашкевіч наведаў парафіяльную супольнасць Найсвяцейшага Адкупіцеля ў Гродне (Дзевятоўка).

На Эўхарыстыі іерарх удзяліў сакрамэнт хрысціянскай сталасці вернікам, якіх было ў цэлым каля 50 чалавек і пераважную частку якіх склала моладзь. Гэта была першая ўрачыстасць канфірмацыі сёлета ў дыяцэзіі.

Біскуп цэлебраваў Імшу ў інтэнцыі тых, хто ў гэты дзень прымаў дары Духа Святога ў сакрамэнце канфірмацыі, просячы аб глыбокай веры для іх.

На літургіі асабліва маліліся за біскупа Кашкевіча, які 13 красавіка адзначаў 32-ю гадавіну свайго абвяшчэння пастырам новаўтворанай дыяцэзіі, заснаванай у той жа дзень Папам Янам Паўлам ІІ.

Звяртаючыся да тых, хто прыступаў да канфірмацыі, іерарх падкрэсліў, што Дух Святы, якога прымае чалавек у гэтым сакрамэнце і які калісьці сышоў на апосталаў у вячэрніку, дае здольнасць быць вучнем Хрыста Пана, але неабходна выканаць адну ўмову – адкрыць сваё сэрца на дзеянне Божай ласкі.

Таму біскуп заахвоціў іх заўсёды быць побач з Езусам, спаўняць Божыя запаведзі, быць здольнымі любіць, прабачаць і служыць Богу і бліжнім.

На заканчэнне Эўхарыстыі прадстаўнікі моладзі выказалі біскупу ўдзячнасць за ўдзяленне сакрамэнту. Таксама яны падзякавалі сваім душпастырам на чале з пробашчам а. Анджэем Ядкоўскім CSsR і катэхетам, якія рыхтавалі да гэтай важнай у іх жыцці падзеі.

Пробашч ад імя гэтай энергічнай парафіяльнай супольнасці і манаскай супольнасці айцоў рэдэмптарыстаў выказаў іерарху віншаванні ў гадавіну яго абвяшчэння пастырам Касцёла на Гродзнешчыне.

Тых, хто прыступіў да канфірмацыі, пробашч заахвоціў працягваць быць з Хрыстом і падкрэсліў, што моладзь гэтай парафіі вельмі добрая, таму Касцёл глядзіць на яе з надзеяй.

Прэс-служба Гродзенскай дыяцэзіі

Фота: Павел Раманчук

15 красавіка, у суботу ў актаве Уваскрасення Пана, біскуп Гродзенскі Аляксандр Кашкевіч наведаў парафію Найсвяцейшага Сэрца Пана Езуса ў Канвелішках (Радунскі дэканат), дзе здзейсніў асвячэнне двух новых алтароў і ўдзяліў сакрамэнт канфірмацыі.

На ўрачыстай Эўхарыстыі прысутнічалі шматлікія парафіяне, госці, духавенства дэканату. Іерарха прывіталі вернікі парафіі і пробашч кс. Дзмітрый Сядлецкі.

Два алтары ў парафіі былі зроблены нядаўна. Адзін з іх прысвечаны св. Ганне, маці Найсвяцейшай Панны Марыі, другі – св. Мікалаю, біскупу, які шмат гадоў з’яўляецца апекуном гэтай парафіяльнай супольнасці.

Імшу іерарх цэлебраваў у інтэнцыі ўсёй парафіі, асабліва за маладых людзей – каля 20 чалавек, якія ў гэты дзень узбагаціліся сямю дарамі Духа Святога ў канфірмацыі.

У гаміліі прэс-сакратар Гродзенскай дыяцэзіі кс. канонік Юрый Марціновіч звярнуў увагу вернікаў на тое, што Езус кожны дзень дае чалавеку свае дары. Багацце гэтых дароў, па словах святара, асабліва можна ўбачыць, прымаючы сакрамэнт хрысціянскай сталасці, да якога належыць прыступаць з верай, каб сапраўды атрымаць іх.

У канцы Эўхарыстыі біскуп падкрэсліў значэнне сакрамэнту канфірмацыі, які абавязвае быць сведкамі Уваскрослага Пана ў штодзённым жыцці.

Пастыр Касцёла на Гродзеншчыне падзякаваў вернікам парафіі на чале з пробашчам за іх пастаянны клопат аб прыгажосці сваёй святыні, якая ў гэты дзень стала яшчэ прыгажэйшай, таму што ў ёй з’явіліся два новыя алтары.

Біскуп заахвоціў прысутных працягваць трываць у веры, умацоўвацца ў любові да Бога і бліжняга.

Прэс-служба Гродзенскай дыяцэзіі

4 кастрычніка ў касцёле Маці Божай Анёльскай у Гродне адбылася адпустовая ўрачыстасць у гонар св. Францішка Асізскага. Таксама ў гэты дзень 17 вернікаў парафіяльнай супольнасці прынялі сакрамэнт хрысціянскай сталасці.

На Эўхарыстыі, якую ўзначаліў біскуп Гродзенскі Аляксандр Кашкевіч, сабраліся шматлікія парафіяне і тыя, хто шануе Бедняка з Асізі.

Пробашч парафіі а. Сяргей Мігун OFMConv прывітаў усіх прысутных і звярнуўся з просьбай да іерарха ўдзяліць сем дароў Духа Святога ў сакрамэнце канфірмацыі вернікам, якія былі адпаведным чынам падрыхтаваны да гэтага сястрой Валерыяй з Шанштацкага Інстытуту Сясцёр Марыі.

Біскуп у гаміліі заахвоціў зірнуць на асобу св. Францішка, які адкрыў, што яго найважнейшая задача – адбудоўваць усю супольнасць Хрыстовага Касцёла, грунтоўна аднаўляць яго праз вяртанне да праўды Евангелля.

“У часы Францішка Каталіцкі Касцёл у духоўным вымярэнні нагадваў руіны: вера людзей была вельмі павярхоўнай, духавенству не хапала руплівасці і запалу ў абвяшчэнні Евангелля, паўставалі шматлікія ерэтычныя рухі і супольнасці, якія разбівалі еднасць Касцёла”, – нагадаў іерарх.

Біскуп падкрэсліў, што сярод гэтай духоўнай блытаніны Пан Бог паклікаў Францішка распачаць аднаўленне Касцёла: не праз рэформы і разломы, не праз бунты і непарадкі, не праз клеймаванне злоўжыванняў і памылак, а праз асабістае пакаянне і навяртанне, праз вяртанне да праўды Евангелля, да паслухмянасці Божаму слову і руплівасці ў абвяшчэнні яго людзям.

Пастыр Касцёла на Гродзеншчыне адзначыў, што Францішак і яго сабраты, якія далі пачатак Ордэну францішканаў, сапраўды духоўна аднавілі тагачасны Касцёл.

“Сваім навучаннем і прыкладам жыцця яны паказалі прыгажосць Евангелля, паказалі, што сапраўдную радасць, поўны супакой і поўнае шчасце можа даць чалавеку толькі Хрыстус і ніхто іншы”, – сказаў іерарх.

Біскуп падкрэсліў, што чым больш чалавек з’яднаны з Хрыстом, чым больш здольны адкрыцца на аздараўляльнае дзеянне Божай ласкі, тым больш радасці і міру будзе мець у сабе і тым больш дабра зможа даць бліжнім. “Нам трэба памятаць, што крыніца духоўнай прыгажосці Францішка – гэта яго асабістыя адносіны з Богам, яго глыбокая вера і любоў да Хрыста ўкрыжаванага”, – звярнуў увагу іерарх, адзначыўшы, што гэта найважнейшае пасланне, якое скіроўвае да сучасных людзей Бядняк з Асізі.

Звяртаючыся да тых, хто ў гэты дзень прымаў сакрамэнт хрысціянскай сталасці, біскуп Кашкевіч нагадаў, што гэты сакрамэнт – запрашэнне, каб весці жыццё, сталае духоўна, гэта значыць заснаванае на трывалым фундаменце веры і хрысціянскіх каштоўнасцяў.

І, хоць сучасны свет так моцна адрозніваецца ад свету часоў Францішка, падкрэсліў іерарх, выклікі, перад якімі стаіць хрысціянін, вельмі падобныя.

“Сёння таксама нялёгка быць верным Хрысту, жыць Яго Евангеллем, дзяліцца дабром з бліжнімі, даваць сведчанне прыналежнасці да Касцёла, імкнуцца да святасці, нягледзячы на спакусы і пагрозы, якія нясе свет”, – сказаў біскуп.

Ён заахвоціў маладых людзей быць на ўзор св. Францішка адкрытымі на дзеянне Духа Святога і не баяцца даверыць Яму саміх сябе і ўсё сваё жыццё.

На заканчэнне Эўхарыстыі тыя, хто атрымаў сем дароў Духа ў сакрамэнце канфірмацыі, выказалі ўдзячнасць іерарху, а таксама тым, хто рыхтаваў іх да гэтай важнай у іх жыцці падзеі.

Кс. Юрый Марціновіч

Фота: Баляслаў Гавецкі

Пра тое, што варта і нават трэба сеяць дабро, быць добрым, як хлеб, бо, хоць адна частка зерня застаецца патаптанай і знішчанай, другая падае на добрую глебу і прыносіць плён, казаў біскуп Гродзенскі Аляксандр Кашкевіч, наведваючы парафіяльную супольнасць Найсвяцейшай Панны Марыі Вастрабрамскай Маці Міласэрнасці (аўгустовак) у Гродне.

17 чэрвеня, у літургічны ўспамін св. брата Альберта Хмялёўскага, іерарх падчас Імшы ў межах наведвання парафіі ўдзяліў мясцовым вернікам сакрамэнт канфірмацыі. Эўхарыстыя цэлебравалася на палявым алтары побач з месцам будаўніцтва святыні, якое ўжо амаль завяршаецца.

Дары Духа Святога прынялі ў гэты дзень у парафіі больш за 50 чалавек.

Звяртаючыся да вернікаў, пастыр Касцёла на Гродзеншчыне нагадаў пра асобу святога Альберта Хмялёўскага. Іерарх адзначыў, як важна быць па яго прыкладзе добрым да людзей, дзяліцца дабром з найбліжэйшымі. Як падкрэсліў біскуп, дзякуючы дабрыні чалавека ўвесь свет стане лепшы.

Іерарх падзякаваў вернікам за малітву ў інтэнцыі духоўных асобаў, а таксама заахвоціў маліцца аб новых пакліканнях. Звяртаючыся да моладзі, ён адзначыў, што, калі Хрыстус кліча кагосьці да такога выключнага служэння ў Касцёле, “нельга заглушаць Яго заклік, а трэба ахвотным сэрцам прыняць гэтае запрашэнне”.

На заканчэнне Імшы тыя, хто прыступіў да сакрамэнту хрысціянскай сталасці, выказалі словы ўдзячнасці ўсім, хто адпаведным чынам рыхтаваў іх да яго прыняцця. Між іншым яны падзякавалі свайму пробашчу кс. Аляксандру Шэмету, кс. Алегу Кудэрку, кс. Артуру Малафею і с. Людміле.

Кс. Юрый Марціновіч

Фота: Вераніка Альшэўская

Генеральны вікарый Гродзенскай дыяцэзіі біскуп Юзаф Станеўскі наведаў парафію св. Яна Паўла ІІ у Смаргоні, дзе ўдзяліў вернікам сакрамэнт канфірмацыі.

Прымаючы сем дароў Духа Святога, парафіяне абавязаліся ўзрастаць у веры і вызнаваць яе ў сваім штодзённым жыцці.

У гаміліі іерарх казаў пра жывую веру з Духа Святога. Біскуп заахвоціў да таго, каб быць адважнымі сведкамі Езуса Хрыста на месцах сваёй вучобы і працы, а таксама сведчыць пра Яго словам і ўчынкам.

На заканчэнне Эўхарыстыі тыя, хто прыняў сакрамэнт хрысціянскай сталасці, выказалі ўдзячнасць у адрас усіх, хто рыхтаваў іх да гэтай падзеі. Між іншым вернікі падзякавалі сваім душпастырам на чале з пробашчам парафіі кс. Яўгенам Учкуронісам.

Прэс-служба Гродзенскай дыяцэзіі

У дзень юбілею 30-годдзя біскупскай сакры, які прыпаў на ўрачыстасць Спаслання Духа Святога, біскуп Гродзенскі Аляксандр Кашкевіч наведаў касцёл Узвышэння Святога Крыжа ў Лідзе (Фару).

Для парафіян гэта быў радасны дзень, калі яны маглі не толькі маліцца за свайго пастыра, але і асабіста выказаць яму віншаванні.

Іерарх узначаліў у святыні Імшу, падчас якой група адпаведна падрыхтаваных вернікаў прыняла сакрамэнт хрысціянскай сталасці, абавязаўшыся вызнаваць веру і жыць паводле яе прынцыпаў.

Біскуп падзякаваў бацькам, дзеці якіх у гэты дзень былі ўзбагачаны сямю дарамі Духа Святога ў канфірмацыі, за клопат аб іх рэлігійным выхаванні і прыклад апостальскай руплівасці, дадзены ў родным доме.

Тых жа, якія ў гэты дзень адкрыліся на Духа Святога, пастыр Гродзенскай дыяцэзіі заахвоціў супрацоўнічаць з ласкай Пана і добра выкарыстоўваць дары, якія паходзяць ад Божага Духа.

На заканчэнне Эўхарыстыі дзеці, моладзь і прадстаўнікі парафіян звярнуліся да юбіляра са шчырымі пажаданнямі. Між іншым яны падарылі іерарху святочны торт з яго гербам.

Пробашч парафіі кс. канонік Уладзімір Гуляй выказаў удзячнасць біскупу, які ў гэты радасны дзень свайго юбілею прыняцця сакры захацеў памаліцца з лідскімі вернікамі.

Кс. Юрый Марціновіч

У вігілію ўрачыстасці Спаслання Духа Святога, 22 мая, у парафіі св. Вацлава ў Ваўкавыску біскуп Гродзенскі Аляксандр Кашкевіч удзяліў сакрамэнт канфірмацыі 96 парафіянам.

На Імшы ў мясцовай святыні сабраліся шматлікія вернікі, сярод якіх былі бацькі і блізкія кандыдатаў да прыняцця сакрамэнту хрысціянскай сталасці. Прысутныя разам маліліся аб святле Духа Святога, патрэбным кожнаму чалавеку ў штодзённым жыцці, у тым, каб прымаць правільныя рашэнні і ісці шляхам, вызначаным Богам.

Эўхарыстыю біскуп Кашкевіч цэлебраваў у інтэнцыі ўсіх, хто ўтварае парафіяльную супольнасць, асабліва ўзносячы малітву за тых, хто атрымліваў у гэты дзень сем дароў Духа Святога ў канфірмацыі.

Прымаючы сакрамэнт, моладзь і дарослыя свядома вызналі сваю веру, паабяцалі пабожна жыць і, калі будзе патрэбна, аддаць жыццё за Хрыста.

Пастыр Касцёла на Гродзеншчыне, звяртаючыся да маладых людзей, прасіў іх годна правесці сваё жыццё, захаваўшы і перадаўшы далей хрысціянскія каштоўнасці.

На заканчэнне Эўхарыстыі вернікі падзякавалі іерарху за ўдзяленне сакрамэнту, а таксама выказалі віншаванні з нагоды 30-годдзя з часу прыняцця ім біскупскай сакры.

Пробашч парафіі кс. прэлат Антоні Філіпчык пажадаў біскупу весці і далей Касцёл на Гродзеншчыне і заўсёды быць добрым айцом дыяцэзіяльнай сям’і.

Кс. Юрый Марціновіч

Фота: Вікторыя Бусловіч

23 мая, ва ўрачыстасць Спаслання Духа Святога, больш за 50 маладых людзей у парафіі Святога Духа ў Гродне (Альшанка) прынялі сакрамэнт канфірмацыі. Сакрамэнт удзяліў арцыбіскуп Тадэвуш Кандрусевіч.

Спасланне Духа Святога – галоўная ўрачыстасць у гэтай парафіі. У гэты дзень парафію наведаў арцыбіскуп Кандрусевіч, які з’яўляецца ўжо не проста яе госцем, а сапраўдным сябрам.

Настрой парафіянам не сапсавала нават благое надвор’е. На ўрачыстасці прысутнічалі таксама іншыя госці: прэфект Міждыяцэзіяльнай вышэйшай духоўнай семінарыі ў Гродне ксёндз Ян Раманоўскі, ксёндз Анджэй Ганчар, які быў дыяканам у гэтай парафіі, і ксёндз Андрэй Бялаблоцкі, яе былы вікарый, які рыхтаваў моладзь да канфірмацыі ў мінулым годзе.

У гаміліі арцыбіскуп адзначыў, што дзякуючы Спасланню Духа Святога розныя народы аб’ядналіся ў адну хрысціянскую сям’ю, якая называецца Касцёлам. Таму Пяцідзясятніца з’яўляецца і святам нараджэння Касцёла.

Іерарх дадаў, што без Святога Духа Касцёл не будзе жывым, а застанецца аморфным. Таксама хрысціянін без Святога Духа “не можа належным чынам выконваць свае абавязкі, асабліва быць сведкам Хрыста ва ўсіх жыццёвых абставінах”.

“Як у дзень Пяцідзясятніцы Святы Дух перамяніў і падбадзёрыў апосталаў, так Ён чыніць і сёння. Ён умацоўвае нас, каб жыць згодна з Божым законам, быць сведкамі Хрыста і мужна абвяшчаць Евангелле сучаснаму свету”, – сказаў арцыбіскуп.

Іерарх нагадаў галоўную мэту сакрамэнту канфірмацыі, які ўдзяляўся ў гэты дзень у парафіі, – “стаць мужнымі сведкамі Евангелля і бараніць нашу хрысціянскую веру”. “Гэта наша місія, якой патрабуе сучасны свет”, – сказаў ён.

“Дарагая моладзь! Вы прымаеце сёння сакрамэнт сталага хрысціянства. Адкрыйцеся на дзеянне Святога Духа. Не зачыняйце дзвярэй перад Ім. Дазвольце Яму духоўна змяняць вас, каб нанава вярнуцца ў стан створаных па вобразу і падабенству Божаму. Толькі духоўна зменены чалавек здольны змяняць аблічча нашай зямлі на лепшае”, – з такімі словамі звярнуўся арцыбіскуп да маладых людзей, дадаўшы, што Хрыстус чакае іх, яны з’яўляюцца надзеяй Касцёла, грамадства і свету.

Таксама ў малітве падчас Імшы памяталі пра біскупа Гродзенскага Аляксандра Кашкевіча з нагоды 30-годдзя яго біскупскага пасвячэння.

Пасля Эўхарыстыі арцыбіскуп Тадэвуш Кандрусевіч распавёў пра пажар, які нядаўна здарыўся ў будслаўскім санктуарыі. Іерарх падзякаваў за ахвяраванні, якія вернікі і людзі добрай волі прынеслі і працягваюць прыносіць на аднаўленне нацыянальнай святыні. Па яго словах, гэта выклік кожнаму з нас, а таксама знак нашай хрысціянскай тоеснасці і супольнай адказнасці за захаванне сакральнай спадчыны. “Нашыя продкі будавалі касцёлы як месца малітвы і шлях да неба. Мы не маем маральнага права іх страціць. Таму супольна адбудуем будслаўскую святыню”, – заахвоціў іерарх.

Падчас Імшы арцыбіскуп благаславіў дзяцей, якія днём раней прыступілі да Першай святой Камуніі. На заканчэнне ўрачыстасці маленькіх вернікаў чакаў канцэрт парафіяльнага дзіцячага гурту “Анёлы”, спевы, забавы і салодкія пачастункі ад святароў і сясцёр законных.

Пасля Эўхарыстыі была магчымасць паразмаўляць з арцыбіскупам і сфатаграфавацца з ім.

Наталля Лазоўская

8 мая біскуп Гродзенскі Аляксандр Кашкевіч цэлебраваў святую Імшу ў парафіі Унебаўзяцця Найсвяцейшай Панны Марыі i св. Язафата Кунцэвіча ў Сапоцкіне.

Падчас урачыстай Эўхарыстыі іерарх удзяліў сакрамэнт канфірмацыі групе моладзі гэтай парафіі, вернікам парафій Перамянення Пана ў Селіванаўцах i Маці Божай Ружанцовай у Лабне.

Бацькі маладых людзей, узбагачаных у гэты дзень сямю дарамі Духа Святога, на пачатку літургіі звярнуліся да біскупа з просьбай аб удзяленні іх дзецям сакрамэнту. Яны адзначылі, што глядзяць на сваіх дзяцей з непакоем, але і даверам, бачаць іх непакой, а таксама дасканала ўсведамляюць, што толькі Хрыстус прыносіць шчасце чалавеку.

Біскуп цэлебраваў Імшу ў інтэнцыі тых, хто прымаў сакрамэнт, і іх парафіяльных супольнасцяў.

“Без дапамогі Духа Святога нам было б неверагодна цяжка верыць, маліцца, жыць у праўдзе, справядлівасці і любові, перамагаць уласныя памылкі і слабасці, змагацца з грахом, спаўняць добрыя ўчынкі, узрастаць у любові да Бога і бліжняга”, – сказаў у гаміліі іерарх, тлумачачы ролю Духа Святога ў жыцці кожнага хрысціяніна.

Біскуп дадаў, што сакрамэнт хрысціянскай сталасці патрэбны чалавеку, каб той добра разумеў, для чаго жыве, чаго павінен жадаць і што павінна быць найважнейшай мэтай жыцця.

Падчас намашчэння алеем хрызма вернікі абавязаліся быць, як апосталы, “сведкамі ў Ерузалеме, усёй Юдэі і Самарыі ажно да краю зямлі” – у сваім асяроддзі, на месцах вучобы і працы, пазбаўляючыся страху, які часта напаўняе сэрцы маладых людзей, і набываючы энтузіязм і ахвоту да жыцця.

На заканчэнне Імшы тыя, хто прыняў сакрамэнт, выказалі падзяку біскупу, святарам і сёстрам законным, якія рыхтавалі іх падчас урокаў катэхезы. Таксама яны запэўнілі, што жадаюць далей падтрымліваць дух святой веры, каб нявер’е не заглушала Бога ў іх сэрцах.

Кс. Юрый Марціновіч

4 мая Генеральны вікарый Гродзенскай дыяцэзіі біскуп Юзаф Станеўскі наведаў парафію Божай Міласэрнасці ў Гродне (Вішнявец).

Падчас Эўхарыстыі іерарх удзяліў сакрамэнт канфірмацыі моладзі і дарослым парафіянам. Сямю дарамі Святога Духа было ўзбагачана ў гэты дзень каля 80 чалавек.

Праз прыняцце сакрамэнту Дух Святы ўвайшоў у жыццё гэтых вернікаў, каб яны былі яшчэ больш звязаны са Святой Тройцай і былі сапраўднымі сведкамі Хрыстовага ўваскрасення.

У гаміліі іерарх падкрэсліў важнасць сакрамэнту і звярнуў увагу на абавязкі, якія вынікаюць з яго прыняцця. Узгадваючы пра Апостальскую адгартацыю Папы Францішка Christus Vivit, скіраваную перш за ўсё да маладых людзей, біскуп назваў моладзь надзеяй Касцёла, што ні ў якім выпадку не можа быць па-за ім, а здольная супольна ўтвараць і нястомна ажыўляць гэты Касцёл.

Таму Генеральны вікарый дыяцэзіі заахвоціў моладзь актыўна ўключацца ў жыццё сваёй парафіяльнай супольнасці, бо ад маладога пакалення залежыць вельмі шмат.

Іерарх дадаў, што Касцёл існуе не толькі для людзей старэйшага ўзросту, але што асабліва малады чалавек можа кожны дзень ажыўляць і амалоджваць яго.

Біскуп пажадаў, каб прыняцце сакрамэнту канфірмацыі яшчэ больш адкрыла маладых людзей на Бога і Яго збаўчую ласку. Таксама ён пажадаў усім парафіянам, узбагачаным сямю дарамі Духа, мужна вызнаваць сваю веру і быць сапраўднымі сведкамі Уваскрослага Пана.

Кс. Юрый Марціновіч

Фота: Баляслаў Гавецкі

22 красавіка біскуп Гродзенскі Аляксандр Кашкевіч наведаў парафіяльную супольнасць Найсвяцейшага Адкупіцеля ў Гродне (Дзевятоўка).

Падчас Эўхарыстыі іерарх удзяліў сакрамэнт хрысціянскай сталасці 35 маладым вернікам.

Біскуп цэлебраваў Імшу ў інтэнцыі маладых людзей, якія ў гэты дзень прымалі дары Духа Святога ў сакрамэнце канфірмацыі, просячы аб глыбокай веры для іх.

У гаміліі іерарх падкрэсліў, што дзякуючы Святому Духу, які з’яўляецца душой Касцёла, Касцёл жыве, развіваецца, абвяшчае Евангелле, здзяйсняе ўчынкі міласэрнасці і шмат іншых добрых справаў.

“Кожны з нас, якія належым да Касцёла, мае ў гэтым свой удзел менавіта дзякуючы Духу Святому”, – дадаў біскуп.

 Іерарх адзначыў, што Дух Святы, якога прымае ў гэты дзень моладзь у канфірмацыі і які калісьці сышоў на апосталаў у вячэрніку, робіць чалавека здольным быць вучнем Хрыста Пана, але неабходна выканаць адну ўмову – адкрыць сваё сэрца на дзеянне Божай ласкі.

Таму пастыр Касцёла на Гродзеншчыне заахвоціў моладзь заўсёды быць побач з Езусам, спаўняць Божыя запаведзі, а таксама быць здольнымі любіць, прабачаць і служыць Богу і бліжнім.

“З дапамогай Духа Святога ідзіце адважна гэтай дарогай за Уваскрослым Хрыстом, нашым Панам і Збаўцам”, – дадаў іерарх.

На заканчэнне Эўхарыстыі прадстаўнікі моладзі выказалі біскупу ўдзячнасць за ўдзяленне ім сакрамэнту. Таксама яны падзякавалі сваім душпастырам на чале з пробашчам парафіі а. Дзмітрыем Лабковым CSsR і катэхетам, якія рыхтавалі да гэтай важнай у іх жыцці падзеі.

Кс. Юрый Марціновіч

Фота: Галіна Валюшка

18 красавіка біскуп Гродзенскі Аляксандр Кашкевіч наведаў парафіяльную супольнасць святога Міхала Арханёла ў Смаргоні.

Падчас Імшы, якая цэлебравалася на палявым алтары, іерарх удзяліў 71 верніку сакрамэнт хрысціянскай сталасці.

У гаміліі біскуп падкрэсліў значэнне сакрамэнту канфірмацыі ў жыцці кожнага чалавека. Па яго словах, гэты сакрамэнт патрэбны чалавеку, каб быць сведкам Уваскрослага Пана ў сённяшнія цяжкія часы, калі неабходныя сапраўдныя вызнаўцы Хрыста.

Пастыр Касцёла на Гродзеншчыне заахвоціў асабліва маладых людзей, якія ў гэты дзень былі ўзбагачаны сямю дарамі Святога Духа, не змарнаваць ласкі, якую дае Бог у гэтым сакрамэнце, а старацца пастаянна ўзрастаць у дасканаласці і імкнуцца да паглыблення сваёй веры.

На заканчэнне ўрачыстасці парафіяне, якія прынялі сакрамэнт, выказалі словы ўдзячнасці іерарху, сваім бацькам, сведкам канфірмацыі, а таксама святарам і сёстрам законным, якія адпаведным чынам рыхтавалі іх да гэтай падзеі.

Пробашч парафіі кс. Павел Шчарбіцкі SDB таксама падзякаваў біскупу за прыбыццё, прамоўленае Божае слова і ўдзяленне сакрамэнту. Тым жа, хто прыступіў у гэты дзень да канфірмацыі, ён пажадаў, каб прыняты сакрамэнт стаў для іх матывам да ўзрастання і духоўнага выспявання ў веры.

Kс. Юрый Марціновіч