2 лютага, у свята Ахвяравання Пана і Сусветны дзень кансэкраванага жыцця, у Гродне адзначылі 80-ы дзень нараджэння сястры Стэлы Ядкоўскaй CSFN, назарэтанкі.

Сястру Стэлу, якая нясе надзею тым, у каго яе няма, называюць “апосталам шпітaляў” горада над Нёманам.

Служэнне ў бальніцы яна пачала ў 1966 г., працуючы там медсястрой. Тады яна ўжо была манахіняй, але ў бальніцы пра гэта не ведалі.

Выконваючы свае абавязкі, яна не толькі клапацілася аб тым, каб даць пацыентам лекі, але і цікавілася іх духоўным жыццём. Калі нехта з іх хацеў прыняць сакрамэнты, яна прыводзіла ў бальніцу святара.

Манахіня цалкам прысвяціла жыццё хворым і пакутуючым. Яна не можа абыякава праходзіць каля тых, хто пакутуе, затрымліваецца ля кожнага шпітальнага ложка, найперш пытаючыся, ці не патрэбныя хворым святыя сакрамэнты.

Гэтае штодзённае служэнне прыносіць сястры радасць, а кожная сустрэча з хворым, які просіць аб споведзі, для яе вялікі дар Божай любові.

Таксама сястра Стэла дала пачатак стварэнню капліц у гродзенскіх бальніцах, хоць гэта было нялёгкай справай.

Акрамя таго, у цяжкія для Касцёла часы назарэтанка дапамагала сотням гродзенскіх вернікаў падрыхтавацца да сакрамэнтаў. У першую чаргу яна рыхтавала дзяцей і моладзь да прыняцця святой Камуніі.

Для Кангрэгацыі Сясцёр Найсвяцейшай Сям’і з Назарэта сястра Стэла – вялікі дар і ўзор для наследавання, асабліва ў яе штодзённым служэнні хворым і пакутуючым.

Прэс-служба Гродзенскай дыяцэзіі

22 жніўня ў сваёй роднай парафіі св. Тэрэзы ад Езуса (Авільскай) у Шчучыне с. Ганнa Мацуль з Кангрэгацыі Сясцёр Найсвяцейшай Сям’і з Назарэта прынесла вечныя манаскія абяцанні.

З 10 па 15 жніўня невялікая група з Гродна арганізавала індывідуальную пілігрымку на роварах у санктуарый Віцебскай дыяцэзіі Маці Божай Валадаркі Азёраў у Браславе.

З 31 ліпеня па 2 жніўня ў кляштары Kангрэгацыi Сясцёр Найсвяцейшай Сям’і з Назарэта ў Навагрудку адбыліся рэкалекцыі для жанчын. На духоўныя практыкаванні прыбылі да назарэтанак 23 удзельніцы з розных месцаў Беларусі.

З 26 па 30 ліпеня невялікая група з Гродна арганізавала індывідуальную пілігрымку на роварах з Гродна ў Нацыянальны санктуарый Маці Божай у Будславе.

31 ліпеня ў Батароўскім лесе каля Навагрудка, дзе 77 гадоў таму былі расстраляны 11 манахінь з Кангрэгацыі Сясцёр Найсвяцейшай Сям’і з Назарэта (назарэтанкі), сабраліся на малітве пілігрымы.

5 сакавіка ў Навагрудку адзначалася 20-годдзе беатыфікацыі 11 назарэтанак, мучаніц часоў ІІ Сусветнай вайны. Законніцы аддалі сваё жыццё ўзамен за ўратаванне 120 чалавек, узятых у палон гестапа.