Малітва не проста рыхтуе нас да вялікіх спраў, малітва і ёсць вялікая справа.
Верныя паслядоўнікі Хрыста заўсёды ўзносілі свае малітвы Нябеснаму Айцу, рэагуючы на несправядлівасць, заступаючыся за прыгнечаных і пазбаўленых права голасу, абараняючы тых, хто ў патрэбе.
Гэтыя малітвы для тых, хто іх прамаўляў, здаваліся, магчыма, толькі кропляй у моры. Але ёсць малітвы, рэха ад якіх выйшла за рамкі часу і пакаленняў. Гэтыя малітвы натхнілі многіх людзей ісці за Хрыстом і распаўсюджваць дзеянне Духа Святога па ўсім свеце.
Узгадваючы гэтыя малітвы, мы не толькі ўмацоўваемся ў веры, але і лепш бачым сваё месца ў Божай гісторыі, якая здзяйсняецца кожны дзень. Давайце паглядзім на некалькі малітваў, якія пакінулі свой адбітак у гісторыі чалавецтва.
1. "Хрыстос перада мной" Святога Патрыка
Многія святыя маліліся вельмі красамоўна, напісалі аб'ёмныя працы, прысвечаныя малітве, а сёння ніхто ўжо іх і не ўспомніць. Але бывае, што нехта запіша словы малітвы, у якіх не толькі ўся сутнасць засяроджваецца ў кароткай фразе, але і ўвесь згустак эмоцый і перажыванняў, і гэта падштурхоўвае нас да больш блізкіх адносін з Богам.
Знакамітая малітва Святога Патрыка "Хрыстос перада мной" цалкам апісвае жаданні паслядоўніка Хрыста: ведаць Хрыста, быць знаёмым Езусу і цалкам пагрузіцца ў атмасферу Ягонай любові. Ведаць гэтую любоў і адчуваць гэты супакой - вось, да чаго імкнуўся Святы Патрык, а яго малітва актуальная і для сучаснага чалавека, які шукае тых жа самых спазнанняў і пачуццяў.
2. Малітва Уільяма Тындейла аб Каралі Англіі
Уільям Тындейл быў перакананы, што кожны англічанін павінен мець магчымасць чытаць Біблію - і кароль, і слуга. Знакаміты навуковец, які валодаў некалькімі мовамі, адным з першых выступіў за права людзей чытаць Біблію самастойна. Каб Бог мог гаварыць з гэтымі людзьмі асабіста, а не праз пасрэдніка-святара.
Тындейл кінуў выклік нежаданню Касцёла дазволіць людзям чытаць Біблію на англійскай мове, за што быў прысуджаны да смерці. Але перад самай смерцю Тындейл прамовіў на вачах натоўпу, што сабраўся побач, наступныя словы: "Божа, адкрый вочы Караля Англіі!" Бог пачуў гэтую малітву - амаль у кожнай англійскай сям'і з'явілася Біблія.
3. Малітва Марціна Лютэра Кінга
Марцін Лютэр Кінг шмат маліўся. Ён верыў у Божую справядлівасць і не мог змірыцца з няроўнасцю сярод людзей. Па гэты дзень наўрад ці хто можа параўнацца з ім у справе барацьбы за роўнасць людзей. Вера ў Езуса Хрыста дапамагала яму працягваць свой шлях. Кінг быў упэўнены, што якое б зло з ім ні здарылася - Бог быў мацней за ўсё гэта.
Ягоная малітва - гэта крык душы, крык аб роўнасці, адзінстве і заклік да вучнёўства. Ён лічыў, што роля касцёла не столькі ў арганізацыі кампаній у абарону ідэй роўнасці, колькі ў аб'яднанні ўсіх людзей вакол надзеі, падараванай Езусам. Яго жаданне "радасці ў адным аркестры чалавецтва пад кіраўніцтвам Бога" не цямнее з часам.
4. Малітва Маці Тэрэзы: "Усё роўна рабі гэта"
Існуе меркаванне, што словы малітвы Маці Тэрэзы "Усё роўна рабі гэта" былі напісаныя на сцяне яе маленькага пакоя ў Калькуце. У гэтай малітве ёсць любоў да Бога і да Яго народу. Наўрад ці сучаснае грамадства можа прывесці прыклады больш ахвярнага прысвячэння сябе служэнню іншым людзям, чым служэнне Маці Тэрэзы.
У гэтай малітве, не вельмі доўгай і шматслоўнай, адлюстроўваецца ўвесь характар Маці Тэрэзы. Абыходзься з людзьмі добра. Любі іх, нягледзячы на іх стаўленне да цябе. Калі яны раздражняюць або крыўдзяць цябе - любі іх яшчэ больш. І памятай, на заходзе дня не так ужо і важна, што пра цябе думаюць людзі. Значна важней - што пра цябе думае Бог. Жыві для Яго.
5. Малітва Езуса ў Гефсіманскім садзе
Малітва Езуса незадоўга да Яго смерці на крыжы, мабыць, самая адчайная і ў той самы час, якая дае надзею. Гэтая малітва выклікае і боль, і падзяку. Божы Сын ведае, праз што Яму трэба будзе прайсці дзеля нашых узаемаадносін з Богам. Схіліўшы калені Ён просіць Айца пранесці пакуты міма Яго. Калі толькі гэта магчыма.
Але Ён ведае, што павінна здарыцца. "Не Мая воля, але Твая няхай споўніцца". Малітва гэтая паказвае, наколькі Езус паслухмяны Айцу - дзякуючы Яго паслушэнству ў нас ёсць ўзаемаадносіны з Богам. І словамі гэтай малітвы незлічоная колькасць хрысціян моліцца дагэтуль. Гэта малітва поўнага самаадрачэння, поўнага падпарадкавання.
Паводле Хрысціяне