Адвэнт – гэта час чакання, калі сэрцы людзей рыхтуюцца сустрэць Езуса. На працягу чатырох тыдняў мы не проста адлічваем дні да Божага Нараджэння – мы ідзём насустрач Хрысту, ачышчаючы душу, умацоўваючы веру і напаўняючы дом малітвай.
Адвэнт-каляндар становіцца не проста ўпрыгажэннем, а правадніком у гэтым духоўным падарожжы для ўсёй сям’і: кожны дзень – як маленькі крок да Бэтлеема, да стаенкі, дзе нарадзіўся Збаўца свету. Праз добрыя справы мы вучымся чакаць з надзеяй, жыць з мірам, радавацца ў Пану і любіць, як Ён палюбіў нас.
Рэдакцыя Grodnensis.by падрыхтавала заданні на кожны дзень:
30 лістапада, дзень першы. Святло першай свечкі – запалі яе і скажы: “Хрыстус – маё Святло”.
1 снежня, дзень другі. Слова дня – прачытай адзін любы радок з Евангелля.
2 снежня, дзень трэці. Маленькая справа любові – дапамажы камусьці ў сям’і без просьбы.
3 снежня, дзень чацвёрты. Цішыня сэрца – падары хвіліну сумеснага маўчання.
4 снежня, дзень пяты. Запіска ўдзячнасці – пакінь маленькае “дзякуй” на стале.
5 снежня, дзень шосты. Добрая справа патаемна – зрабі дабро, не называючы сябе.
6 снежня, дзень сёмы. Сімвал надзеі – пастаў маленькі знак (зорачку, анёла) у доме.
7 снежня, дзень восьмы. Святло другой свечкі – няхай яна нагадвае пра мір.
8 снежня, дзень дзявяты. Малітва за бліжняга – назаві імя таго, каму патрэбна патрымка.
9 снежня, дзень дзясяты. Учынак клопату – прыгатуй гарбату ці пачастунак для сям’і.
10 снежня, дзень адзінаццаты. Добры ўспамін – падзяліся радасным момантам мінулага года.
11 снежня, дзень дванаццаты. Слова суцяшэння – скажы камусьці: “Ты важны”.
12 снежня, дзень трынаццаты. Смак чакання – спячыце што-небудзь разам.
13 снежня, дзень чатырнаццаты. Святло трэцяй свечкі – яна гарыць дзеля радасці.
14 снежня, дзень пятнаццаты. Справа радасці – зрабі для сябе тое, што прынясе радасць.
15 снежня, дзень шаснаццаты. Маленькая ахвяра – адмоўся ад лішняга дзеля іншага.
16 снежня, дзень сямнаццаты. Слова радасці – падзяліся добрай навіной.
17 снежня, дзень васямнаццаты. Слова надзеі – прачытай прароцтва аб прыйсці Збаўцы.
18 снежня, дзень дзевятнаццаты. Цеплыня рук – абдымі блізкага.
19 снежня, дзень дваццаты. Малітва за мір – прамоўце яе ўсёй сям’ёй.
20 снежня, дзень дваццаць першы. Дзень клопату аб чысціні сэрца – паспавядайся.
21 снежня, дзень дваццаць другі. Святло чацвёртай свечкі – яна нагадвае пра любоў.
22 снежня, дзень дваццаць трэці. Знак гатоўнасці – упрыгож дом да Божага Нараджэння маленькай дэталлю.
23 снежня, дзень дваццаць чацвёрты. Хатні спакой – збярыся з сям’ёй на вячэрнюю малітву.
24 снежня, дзень дваццаць пяты. Ноч чакання – збярыцеся разам з сям’ёй, каб сустрэць нараджэнне Езуса.